33 C
Bangalore, IN
Friday, April 28, 2017

ದಿನನಿತ್ಯದ ಸುದ್ದಿ- ಅಭಿಪ್ರಾಯಗಳ ಲೋಕವನ್ನು ಅಕ್ಷರ, ಆಡಿಯೋ, ವಿಡಿಯೋಗಳ ಬಹುಮಾಧ್ಯಮವನ್ನು ಉಪಯೋಗಿಸಿಕೊಂಡು ಪ್ರಚುರಪಡಿಸಲಿರುವ ಅಂತರ್ಜಾಲ ಪತ್ರಿಕೆಯೇ ಡಿಜಿಟಲ್ ಕನ್ನಡ. ಸುದ್ದಿ- ಅಭಿಪ್ರಾಯಗಳನ್ನು ಸ್ಮಾರ್ಟ್ ಫೋನ್ ಮತ್ತು ಕಂಪ್ಯೂಟರ್ ಕಿಟಕಿಯಲ್ಲಿ ಅಂತರ್ಜಾಲ ಮಾಧ್ಯಮದಲ್ಲೇ ಗ್ರಹಿಸುವ ದೊಡ್ಡದೊಂದು ಡಿಜಿಟಲ್ ಜನಸಂಖ್ಯೆ ರೂಪುಗೊಂಡಿದೆ. ಇವರಿಗೆ ಹೊಸಕಾಲಕ್ಕೆ ಪ್ರಸ್ತುತವಾಗಿರುವ ಮಾಹಿತಿ- ಮನರಂಜನೆ ಒದಗಿಸುವುದು ಡಿಜಿಟಲ್ ಕನ್ನಡ ದ ಗುರಿ. ಡಿಜಿಕನ್ ಮಲ್ಟಿಮೀಡಿಯಾ ಪ್ರೈವೇಟ್ ಲಿಮಿಟೆಡ್ ಎಂಬ ನೋಂದಾಯಿತ ಕಂಪನಿ ಅಡಿಯಲ್ಲಿ ಡಿಜಿಟಲ್ ಕನ್ನಡ ಕಾರ್ಯನಿರ್ವಹಿಸಲಿದೆ.

ಡಿಜಿಟಲ್ ಕನ್ನಡ ದ ಮುಖ್ಯ ಸಂಪಾದಕ ಪಿ. ತ್ಯಾಗರಾಜ್ ಅವರದ್ದು ಪತ್ರಿಕೋದ್ಯಮದಲ್ಲಿ ಭರ್ತಿ ಮೂರು ದಶಕಗಳ ಅನುಭವ. ಟೈಮ್ಸ್ ಆಫ್ ಇಂಡಿಯಾ ದಿಂದ ವೃತ್ತಿ ಪ್ರಾರಂಭಿಸಿ ನಂತರ ಈ ಸಂಜೆ, ಸಂಯುಕ್ತ ಕರ್ನಾಟಕ, ವಿಜಯ ಕರ್ನಾಟಕ, ಕನ್ನಡಪ್ರಭ ಇಂಥ ಪ್ರಸಿದ್ಧ ಸಂಸ್ಥೆಗಳಲ್ಲಿ ಅತಿಮುಖ್ಯ ಹುದ್ದೆಗಳನ್ನು ನಿಭಾಯಿಸಿದ್ದಾರೆ. ಡಿಜಿಟಲ್ ಕನ್ನಡ ಆರಂಭಕ್ಕೂ ಮುಂಚೆ ಅವರುನ್ನಡಪ್ರಭ ದಲ್ಲಿ ಸಹಾಯಕ ಸಂಪಾದಕರಾಗಿದ್ದರು.

ರಾಜ್ಯವನ್ನೇ ಅಲ್ಲಾಡಿಸಿದ ಮಂತ್ರಿ ಹರತಾಳು ಹಾಲಪ್ಪ ಅತ್ಯಾಚಾರ ಪ್ರಕರಣವನ್ನು ಬ್ರೇಕ್ ಮಾಡಿದ ಶ್ರೇಯಸ್ಸು ಇವರದ್ದು. ಹಾಲಪ್ಪ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದು ಈಗ ಇತಿಹಾಸ. ಎಸ್ ಎಂ ಕೃಷ್ಣ ಸರ್ಕಾರದ ಅವಧಿಯಲ್ಲಿ ವಿಜಯ ಕರ್ನಾಟಕ ದಲ್ಲಿ ಇವರು ಬರೆದ ದಂಡಪಿಂಡಗಳು‘ ಎಂಬ ಸಚಿವರ ಕಾರ್ಯವೈಖರಿ ವಿಶ್ಲೇಷಣೆಯ ಸರಣಿಯನ್ನು ಓದುಗರು ಇಂದಿಗೂ ನೆನಪಿಸಿಕೊಳ್ಳುತ್ತಾರೆ. ಸಿದ್ದರಾಮಯ್ಯ ಸರ್ಕಾರವು ಪ್ರಸ್ತಾಪಿಸಿದ್ದ ಧಾರ್ಮಿಕ ದತ್ತಿ ವಿಧೇಯಕದ ಲೋಪಗಳನ್ನು ವಿವರಿಸಿ ಕನ್ನಡಪ್ರಭದಲ್ಲಿ ಇವರು ಮಾಡಿದ್ದ ವಿಶ್ಲೇಷಣೆಯಿಂದ ಸರ್ಕಾರ ಆ ಪ್ರಸ್ತಾವನೆಯನ್ನೇ ಹಿಂತೆಗೆದುಕೊಂಡಿತು. ರಾಜಕೀಯ ವರದಿಗಾರಿಕೆ, ವಿಶ್ಲೇಷಣೆಗಳು ಇವರ ಬಲ. ಒಳಸುಳಿ, ಚಾಟಿ ಚಟಾಕಿ ಎಂಬ ಅಂಕಣಗಳು ಜನಪ್ರಿಯವಾಗಿದ್ದು, ಪುಸ್ತಕ ರೂಪದಲ್ಲೂ ಲಭ್ಯ. ಕರ್ನಾಟಕ ಮಾಧ್ಯಮ ಅಕಾಡೆಮಿ ಪ್ರಶಸ್ತಿ, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ಬೆಂಗಳೂರು ಪ್ರೆಸ್ ಕ್ಲಬ್ ವರ್ಷದ ವ್ಯಕ್ತಿ ಪ್ರಶಸ್ತಿ ಸೇರಿದಂತೆ ನಾನಾ ಪ್ರಶಸ್ತಿಗಳು ಲಭ್ಯವಾಗಿವೆ. ಕರ್ನಾಟಕದ ನಾನಾ ಭಾಗಗಳ ಸುದ್ದಿಮೂಲ ಮತ್ತು ಸುದ್ದಿಯ ವ್ಯಕ್ತಿಗಳೊಂದಿಗೆ ಇವರಿಗಿರುವ ಒಡನಾಟಗಳು ಡಿಜಿಟಲ್ ಕನ್ನಡ ವನ್ನು ರೂಪಿಸಲಿವೆ.

ಇವರೊಂದಿಗೆ ಸಹ ಸಂಪಾದಕರಾಗಿ ಜತೆಗೂಡಿರುವವರು ಚೈತನ್ಯ ಹೆಗಡೆ. ‘ವಿಕ್ರಮ’ ‘ವಿಜಯ ಕರ್ನಾಟಕ’, ‘ಕನ್ನಡಪ್ರಭ’ ಪತ್ರಿಕೆಗಳಲ್ಲಿ ಕಾರ್ಯನಿರ್ವಹಣೆ. ಎಂಟು ವರ್ಷಗಳ ಪತ್ರಿಕೋದ್ಯಮದ ಅನುಭವ. ಈ ಯೋಜನೆಗೂ ಮುಂಚೆ ಕನ್ನಡಪ್ರಭ ದಲ್ಲಿ ಮುಖ್ಯ ಉಪಸಂಪಾದಕ ಹುದ್ದೆ ನಿರ್ವಹಣೆ. ಸೀಮಿತ ಅವಧಿಯಲ್ಲೇ ಸಂಪಾದಕೀಯ ಮತ್ತು ಅಭಿಪ್ರಾಯ ಪುಟಗಳ ಹೊಣೆ ನಿಭಾಯಿಸಿದ್ದಾರೆ. ಜತೆಗೆ ಅಂಕಣಕಾರ, ಎರಡು ಪುಸ್ತಕಗಳ ಕೃತಿಕಾರ. ರಾಷ್ಟ್ರೀಯ ವಿದ್ಯಮಾನ, ಜಾಗತಿಕ ಪಲ್ಲಟಗಳು, ಉದ್ಯಮ ಜಗತ್ತಿನ ಆಯಾಮಗಳು, ಪುಸ್ತಕ- ಚಲನಚಿತ್ರ ಇಂಥವೆಲ್ಲ ವಿಭಾಗಗಳಲ್ಲಿ ಡಿಜಿಟಲ್ ಕನ್ನಡದ ಆಲೋಚನೆ- ಅಭಿಮತಗಳನ್ನು ರೂಪಿಸುವುದರಲ್ಲಿ ಇವರ ಕೌಶಲ ಕೆಲಸ ಮಾಡಲಿದೆ.

ಜತೆಗೆ ಸುದ್ದಿ ಮತ್ತು ತಾಂತ್ರಿಕ ನಿರ್ವಹಣೆಯ ತಂಡವಿದೆ. ನಾಡಿನ ಹಳೆ- ಹೊಸ ತಲೆಮಾರಿನ ಅಭಿಪ್ರಾಯ ನಿರೂಪಕರು, ಬರಹಗಾರರು ಮತ್ತು ಸೃಜನಶೀಲರ ವೇದಿಕೆಯೂ ಆಗಲಿದೆ ಡಿಜಿಟಲ್ ಕನ್ನಡ.

ಡಿಜಿಟಲ್ ಕನ್ನಡಕ್ಕೆ ಬರೆಯುವವರು, ಸುದ್ದಿ ತಲುಪಿಸುವವರು ಬಳಸಬೇಕಾದ ಮಿಂಚಂಚೆ.

editor@digitalkannada.com

ವಿಳಾಸ

ಡಿಜಿಕನ್ ಮಲ್ಟಿಮೀಡಿಯ ಪ್ರೈವೇಟ್ ಲಿಮಿಟೆಡ್

ನಂ1, 1ನೇ ತಿರುವು, ವಿಸ್ಮಯ ಕಾಂಪ್ಲೆಕ್ಸ್, ಮುನೇಶ್ವರ ನಗರ

ಚಿಕ್ಕಲಸಂದ್ರ, ಬೆಂಗಳೂರು- 560061

ಫೋನ್- 42052448