ಹತ್ತನೇ ವರ್ಷಾಚರಣೆ ಮಾಡಿಕೊಂಡ ಈ ದಲಿತ ಒಕ್ಕೂಟ ಹೇಗೆ ವಿಭಿನ್ನ ಗೊತ್ತಾ?

Shri Milind Kamble, Chairman, Dalit Indian Chamber of Commerce and Industry, and a delegation of Dalit Entrepreneurs, calling on the Prime Minister, Shri Narendra Modi, in New Delhi on August 07, 2014.

 

(ಇಂಟರ್ನೆಟ್ ಸಂಗ್ರಹ ಚಿತ್ರ)

ಡಿಜಿಟಲ್ ಕನ್ನಡ ಟೀಮ್

‘ಮೇಲ್ವರ್ಗದವರು ಶತಮಾನಗಳಿಂದ ದಲಿತರನ್ನು ತುಳಿಯುತ್ತಿದ್ದಾರೆ. ಇದರ ವಿರುದ್ಧ ಸಿಡಿದೇಳಬೇಕು…’

‘ಪುರೋಹಿತಶಾಹಿ ಶಕ್ತಿಗಳು ದಲಿತರ ಏಳ್ಗೆಯಾಗದಂತೆ ತಡೆಯುತ್ತಿವೆ…’

ಪರಿಶಿಷ್ಟ ಜಾತಿ/ ಪರಿಶಿಷ್ಟ ಪಂಗಡಗಳನ್ನು ಉದ್ದೇಶಿಸಿ ನಡೆಸುವ ಹೆಚ್ಚಿನ ಸಭೆಗಳಲ್ಲಿ ಇಂಥದೊಂದು ಭಾಷಣದ ಮಾತು ಇದ್ದೇ ಇರುತ್ತದೆ.

ಆದರೆ, ಮಂಗಳವಾರ ಪ್ರಧಾನಿ ನರೇಂದ್ರ ಮೋದಿಯವರು ಉದ್ಘಾಟಿಸಿದ ದಲಿತ ಸಮ್ಮೇಳನವೊಂದರ ಜಾಡೇ ಬೇರೆ. ಡಿಐಸಿಸಿಐ ಅರ್ಥಾತ್ ದಲಿತ್ ಇಂಡಿಯನ್ ಚೇಂಬರ್ ಆಫ್ ಕಾಮರ್ಸ್ ಆ್ಯಂಡ್ ಸೊಸೈಟಿ ತನ್ನ 10ನೇ ವಾರ್ಷಿಕೋತ್ಸವವನ್ನು ಆಚರಿಸಿಕೊಂಡಿತು. ದಲಿತರಲ್ಲಿ ಉದ್ಯಮಶೀಲತೆ ಬೆಳೆಸುವುದು ಸಮುದಾಯದ ಅಂತಃಸತ್ವವನ್ನು ಎತ್ತಿ ಹಿಡಿಯುವುದಕ್ಕೆ, ತನ್ನನ್ನು ಕಾಡುತ್ತಿರುವ ಸಮಸ್ಯೆಗಳಿಂದ ಪಾರಾಗುವುದಕ್ಕೆ ಅತಿ ಸೂಕ್ತ ಮಾರ್ಗ ಎಂಬುದನ್ನು ಪ್ರತಿಪಾದಿಸುತ್ತ ಬಂದಿದೆ ಡಿಐಸಿಸಿಐ. ಹಾಗೆಂದೇ ಅದು ಈ ಮೇಲೆ ಉಲ್ಲೇಖಿಸಿದ ಚರ್ವಿತ ಚರ್ವಣ ಉದ್ಘೋಷ- ಪ್ರಚೋದನೆಗಳಿಂದ ಆದಷ್ಟು ಅಂತರ ಕಾಪಾಡಿಕೊಂಡು ಬಂದಿದೆ.

ಹತ್ತನೇ ವಾರ್ಷಿಕೋತ್ಸವ ಸಮ್ಮೇಳನ ಉದ್ಘಾಟಿಸಿದ ಪ್ರಧಾನಿ ಮಾತಿನ ಸಾರ ಹೀಗಿತ್ತು-

‘ಬಾಬಾ ಸಾಹೇಬರು ಸರಿಯಾಗಿಯೇ ಹೇಳಿದ್ದರು. ನಮ್ಮ ದಲಿತ ಸಹೋದರರು ಭೂರಹಿತರಾಗಿರುವುದರಿಂದ ಕೈಗಾರಿಕರಣ ಅವರಿಗೆ ದೊಡ್ಡ ಮಟ್ಟದಲ್ಲಿ ಸಹಾಯ ಮಾಡುತ್ತದೆ ಎಂದಿದ್ದರವರು. ನಮ್ಮ ಸರ್ಕಾರ ಈ ಬಗೆಯ ಆರ್ಥಿಕ ಒಳಗೊಳ್ಳುವಿಕೆಗೆ ಯಾವತ್ತೂ ಬದ್ಧವಾಗಿದೆ. ಉದ್ಯೋಗ ಕೇಳುವವರನ್ನಲ್ಲ, ಉದ್ಯೋಗದಾತರನ್ನು ಸೃಷ್ಟಿಸಬೇಕೆಂಬುದೇ ಆರ್ಥಿಕ ಒಳಗೊಳ್ಳುವಿಕೆ ಯೋಜನೆಗಳ ಉದ್ದೇಶವಾಗಿದೆ. ಮುದ್ರಾ ಯೋಜನೆ ಅಡಿ 80 ಲಕ್ಷ ಮಂದಿ ಯಾವುದೇ ಅಡೆತಡೆ ಇಲ್ಲದೇ ಸಾಲ ತೆಗೆದುಕೊಂಡಿದ್ದಾರೆ. ದಲಿತರು ಮತ್ತು ಹಿಂದುಳಿದ ವರ್ಗದವರಿಗೆ ಇದು ದೊಡ್ಡ ಮಟ್ಟದಲ್ಲಿ ಸಹಾಯವಾಗಿದೆ. ದಲಿತರು ಒಳ್ಳೆ ಬಟ್ಟೆ ಹಾಕಿದರೆ ಸಹಿಸದ, ಅವರಿಗೆ ಸಾಲ ನಿರಾಕರಿಸುವ ಕಷ್ಟದ ಸ್ಥಿತಿ ಬಗ್ಗೆ ನನಗೂ ಗೊತ್ತು. ಅಲ್ಲಿಂದ ಮುಂದೆ ಸಾಗಬೇಕಿದೆ. ಅಂಬೇಡ್ಕರ್ ಅವರು ಸಂವಿಧಾನ ನಿರ್ಮಾತೃರಷ್ಟೇ ಅಲ್ಲ, ಉತ್ತಮ ಹಣಕಾಸು ತಜ್ಞರೂ ಆಗಿದ್ದರು’

ಇಂಥ ಸಮ್ಮೇಳನ ಆಯೋಜಿಸಿ, ಪ್ರಧಾನಿಯವರನ್ನು ಉದ್ಘಾಟನೆಗೆ ಆಹ್ವಾನಿಸಿದ ಡಿಐಸಿಸಿಐನ ಉದ್ದೇಶವೂ ಸ್ಪಷ್ಟ. ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷಿ ಯೋಜನೆಗಳಾದ ಡಿಜಿಟಲ್ ಇಂಡಿಯಾ, ಮೇಕ್ ಇನ್ ಇಂಡಿಯಾ ಮತ್ತು ಸ್ಕಿಲ್ ಇಂಡಿಯಾಗಳಲ್ಲಿ ದಲಿತ ಉದ್ದಿಮೆದಾರರಿಗೆ ಸಿಗಬಹುದಾದ ಅವಕಾಶಗಳನ್ನು ಸೂಕ್ತವಾಗಿ ಉಪಯೋಗಿಸಿಕೊಳ್ಳುವ ಇಂಗಿತ ಇಲ್ಲಿದೆ.

ಉದ್ಯಮಿ, ಸಿವಿಲ್ ಎಂಜಿನಿಯರ್ ಮಿಲಿಂದ್ ಕಾಂಬ್ಳೆ ಅವರ ನೇತೃತ್ವದಲ್ಲಿ 2005ರಲ್ಲಿ ಪುಣೆಯಲ್ಲಿ ಸ್ಥಾಪನೆಯಾಯಿತು ಡಿಐಸಿಸಿಐ. ಭಾರತದಲ್ಲಿರುವ ದಲಿತ ಉದ್ದಿಮೆದಾರರನ್ನೆಲ್ಲ ಒಂದು ಛತ್ರದಡಿ ತರುವ ಉದ್ದೇಶ ಹೊಂದಿರುವ ಸಂಸ್ಥೆ, ನಾವು ಉದ್ಯೋಗ ನೀಡುವವರಾಗಬೇಕೇ ಹೊರತು ಕೇಳುವವರಾಗಬಾರದು ಎಂಬುದನ್ನೇ ಘೋಷವಾಕ್ಯವನ್ನಾಗಿ ಹೊಂದಿದೆ. ಈ ಹತ್ತು ವರ್ಷಗಳಲ್ಲಿ ಅದು 18 ರಾಜ್ಯಗಳು ಮತ್ತು 7 ಅಂತಾರಾಷ್ಟ್ರೀಯ ವೇದಿಕೆಗಳಿಗೆ ತನ್ನ ಹರವನ್ನು ವಿಸ್ತರಿಸಿಕೊಂಡಿದೆ. ಕಾಸ್ಟ್ (ಜಾತಿ) ಅನ್ನು ಕ್ಯಾಪಿಟಲ್ (ಬಂಡವಾಳ) ಮೂಲಕ ಎದುರಿಸಬೇಕು ಎಂಬ ಭಿನ್ನ ನಡೆಯ ಈ ಸಂಸ್ಥೆ ದಲಿತರು ಮುಂಚೂಣಿಯಲ್ಲಿರುವ ಉದ್ದಿಮೆಗಳನ್ನು ಬೆಳೆಸುವುದಕ್ಕೆ, ಅಗತ್ಯ ವೃತ್ತಿಜಾಲವನ್ನು ನಿರ್ಮಿಸುವುದಕ್ಕೆ, ಈ ಬಗ್ಗೆ ವಿಚಾರ ಸಂಕಿರಣಗಳನ್ನು ನಡೆಸುವುದಕ್ಕೆ, ಸರ್ಕಾರಕ್ಕೆ ತನ್ನ ಗುರಿಗಳನ್ನು ಮನದಟ್ಟು ಮಾಡಿಸಿ ಅಗತ್ಯ ಸಹಕಾರ ಗಳಿಸುವುದಕ್ಕೆ ತನ್ನ ಶಕ್ತಿ ವಿನಿಯೋಗಿಸುತ್ತಿದೆ.

Leave a Reply