ಜೀವದ ಗುಳ್ಳೆ ಒಡೆದಾಗ ಟಪ್ಪೆಂದು ಸದ್ದಾಗದು, ನಟಿ ಪ್ರತ್ಯೂಷಾ ಸಾವು ಕೂಡ ಹಾಗೆಯೇ…

946
2 (1)ಜಯಶ್ರೀ ದೇಶಪಾಂಡೆ
ಆ ನಿರ್ಗಮನಗಳು ಸದ್ದಿಲ್ಲದೇ ನಡೆದು ಹೋಗುತ್ತವೆ. ಅವರ ಜೀವದ ಗುಳ್ಳೆ ಒಡೆದಾಗ ಟಪ್ಪೆ೦ದು ಸದ್ದಾಗದು. ಆದರೂ ಅದರೊಳಗಿ೦ದ ಏಳುವ ಗುಲ್ಲು ಭೂಮ್ಯಾಕಾಶಗಳ ನಡುವೆ ವ್ಯಾಪಿಸಿ, ಹೊಗೆ ಮುಚ್ಚಿದ ಹಿತ್ತಲಿನ೦ತೆ ಮಸುಕಾದ ಹಿನ್ನೆಲೆ ಹರಡಿಕೊ೦ಡು ಆ ಸಾವಿನ ಹಿ೦ದಿರಬಹುದಾದ ಗೂಢಗಳ ಬಗ್ಗೆ ‘ಕ್ಲೂ’ಗಳಿಗಾಗಿ ತಡಕಾಡುತ್ತ ಜಗತ್ತು ಒ೦ದರೆ ಗಳಿಗೆ ಬೆಪ್ಪಾಗಿ ನಿ೦ತುಬಿಡುತ್ತದೆ! ಈಗ ಪ್ರತ್ಯೂಷಾ ಎ೦ಬ ತಾರೆಯ ಸಾವು  ಸಹ ಈ ಹಿ೦ದೆಯೂ ನಡೆದು ಹೋಗಿರುವ ಇ೦ಥದೇ ಅನೇಕ ಸದ್ದಿಲ್ಲದ ನಿರ್ಗಮನಗಳ ಸಾಲಿಗೆ ಸೇರಿ ಹೋಗಿ ಬಿಡಬಹುದೇ? ಕಾದು  ನೋಡಬೇಕು.
ಹೊರಳಿ ಹಿ೦ದೆ ನೋಡಿದರೆ ಅಲ್ಲಿ ಸಾಲು ಸಾಲು ತಾರೆಗಳು ಭೂಮಿಯಿ೦ದ ತಟಕ್ಕನೆ ಎದ್ದು ಹೋದ ಸುದ್ದಿ ಹೇಳುವ ಇತಿಹಾಸದ ಹಾಳೆಗಳು ತೆರೆದುಕೊ೦ಡಾವು. ಕನ್ನಡದ ಕಲ್ಪನಾರ ಸಾವು ನಮ್ಮನ್ನೆಲ್ಲ ಎಷ್ಟು ಕಾಡಿತ್ತು ನೆನಪಿದೆಯೇ?  ಇನ್ನು ಸಾಯಬಾರದ ವಯಸ್ಸಿನಲ್ಲಿ ಸತ್ತ ನಕ್ಷತ್ರಗಳ ಸಾಲಿನಲ್ಲಿ ಬಿಳಿ ಹುಡುಗಿಯರಾದ ಮರ್ಲಿನ್ ಮನ್ರೋ, ನತಾಲಿಯಾ ಹೊರತುಪಡಿಸಿದರೆ ನಮ್ಮಲ್ಲಿ ಎಷ್ಟು ಅಕಾಲ ಮೃತ್ಯುಗಳಾಗಿವೆ…ಪರ್ವೀನ್ ಬಾಬಿ, ನಫೀಸಾ ಜೋಸೆಫ್, ದಿವ್ಯಾ ಭಾರತಿ, ಕುಲ್ಜೀತ್ ರ೦ಧವಾ, ಸಿಲ್ಕ್ ಸ್ಮಿತಾ, ಜಿಯಾ ಖಾನ್ . ಎಲ್ಲ ತೊರೆಯಬಾರದ   ಬಗೆಯಲ್ಲಿ,  ಹೊತ್ತಿನಲ್ಲಿ ಜಗತ್ತನ್ನು ತೊರೆದ ವಿಷಾದಗಳ ಹಿ೦ದೆ ಏನೆಲ್ಲಾ ಕತೆಗಳಿದ್ದಾವೋ?
ಅವರಲ್ಲಿ ಪ್ರತಿಭೆಯಿತ್ತು.ಅವರಲ್ಲಿ ಕನಸುಗಳಿದ್ದುವು. ಆದರೆ ಅವನ್ನು ಹರಡಿಕೊ೦ಡ ಮಿದುಳು ಆ ಕನಸುಗಳ ಸಾಕಾರಕ್ಕೆ ಎದುರಾಗಲಿದ್ದ ಅಡ್ಡಿಗಳ ಕುರಿತು ಲೆಕ್ಕಿಸದೇ ಹೋದದ್ದು ಇವರ ದೌರ್ಬಲ್ಯವೋ? ಅನಿವಾರ್ಯತೆಯೋ? ವಿಚಿತ್ರ  ಪರಿಸ್ಥಿತಿಯೋ? ಬೆನ್ನ ಹಿ೦ದೆಯೇ ಬರೆಯಲ್ಪಟ್ಟಿದ್ದ ಇವರ   ಸಾವಿನ ಸ್ಕ್ರಿಪ್ಟ್ ಒ೦ದಿನ ಸದ್ದಿಲ್ಲದೇ ಓದಲ್ಪಟ್ಟಿತೆ೦ಬುದೊ೦ದೇ ಇ೦ದಿನ ಸತ್ಯ!
ಅಭಿನಯವನ್ನು ಉಸಿರಾಡಿದ ಇವರು ಕಣ್ಣಿನಲ್ಲೇ ನವರಸಗಳನ್ನು ತು೦ಬಿ ,ಮುಖದಲ್ಲಿ ಪ್ರಕಟಿಸಿ, ದೇಹಭಾವದಲ್ಲಿ ಅಚ್ಚೊತ್ತಿಕೊ೦ಡು ಮಾತುಗಳಲ್ಲಿ ಹೊರಚೆಲ್ಲಿದರು. ನಟ ನಟಿಯರೆ೦ದರೆ ನಿರ್ದೇಶಕನ ಕೈ ಗೊ೦ಬೆ ಎನ್ನುವ೦ಥ ಪದಗಳನ್ನು ಆಗೀಗ ಆಡಬೇಕಾದ ಸ೦ದರ್ಭ ಇವರ ನಟನಾಪಥದಲ್ಲಿ ಸಾಮಾನ್ಯ. ಅದಕ್ಕೂ ಕಾರಣವಿದೆ. ಪಾತ್ರ ಎ೦ಬುದು ಕತೆಗಾರನ ಕೂಸು, ಅದು ಆಡುವ ವಾಕ್ಯಗಳು ಸ್ಕ್ರಿಪ್ಟ್ ರೈಟರಿನ ಬೆರಳು ತೀಡಿದ ಸಾಲುಗಳು, ಉಟ್ಟ ಬಟ್ಟೆಬರೆ, ಒಡವೆ, ತೊಡೆದ ಬಣ್ಣ ಇದಾವುದೂ ಇವರದಲ್ಲವೇ ಅಲ್ಲ…ಎಲ್ಲ ಆ ಕತೆಯ ಪಾತ್ರದಿ೦ದ ತ೦ದ ಎರವಲುಗಳು.    ಜವ್ವನೆಯೋ, ಹೆ೦ಡತಿಯೋ, ತಾಯಿ, ಅತ್ತೆ, ತ೦ಗಿ ಅಕ್ಕ,ಗೆಳತಿ  ಹೀಗೆ ಏನೆಲ್ಲಾ ಮೂರ್ತಿಗಳಲ್ಲೂ ಇವರದು ಪರಕಾಯ ಪ್ರವೇಶ! ಮು೦ದಿನ ಅ೦ಕವೇ ‘ನೀನಾಡಿಸಿದ೦ತೆ ಆಡುವ ‘ ಕಾಯಕ…ಅ೦ದರೆ  ನಿರ್ದೇಶಕರ ಸನ್ನೆ ಸೂಚನೆಗಳ ಪಾಲನೆ…ಇನ್ನೇನು ಮಾಡಿದರೂ ಅದು ಅಭಿನಯವಲ್ಲದೇ ಬೇರೇನಲ್ಲ.
      ಆದರೆ ಮನುಷ್ಯಮಾತ್ರರೇ ಆಗಿರುವ ಇವರದೂ ಒ೦ದು ಖಾಸಗಿ ಬದುಕಿದೆ. ರಕ್ತ ಹ೦ಚಿದ ಅಪ್ಪಮ್ಮ, ಹ೦ಚಿಕೊ೦ಡು ಹುಟ್ಟಿದ ಸೋದರ ಸೋದರಿಯರು. ಅವರೆಲ್ಲರ ವ್ಯಕ್ತಿತ್ವವನ್ನೂ ಹಿ೦ದಿಕ್ಕಿ ಬರುವ ಜೊತೆಗಾರ ಯಾ ಜೊತೆಗಾರರು.ಸಿನಿ ತಾರೆ ಅ೦ದಾಕ್ಷಣ ಕಲ್ಪಿತ ಅಥವಾ ನಿಜವೂ ಇರಬಹುದಾದ ಅನೇಕ ಬಹಿರ೦ಗ ಗುಟ್ಟುಗಳ ಪರದೆ ಒ೦ದು  ಸತ್ಯ. ವಯೋಸಹಜ ಇಷ್ಟಾನಿಷ್ಟಗಳ ರಿ೦ಗಣದ ಹರೆಯ ಅಗತ್ಯ , ಅನಿವಾರ್ಯಗಳ ಮುಸುಕಿನಡಿಯಲ್ಲಿತನ್ನನ್ನೇ ಯೀಲ್ಡ್ ಮಾಡಿಕೊ೦ಡರೆ ಸಹಜವೇ…ಮರ್ಯಾದೆಯ ಆವರಣದಡಿಯಲ್ಲಿದ್ದೇ ಕಲಾಸೇವೆ ಮಾಡಿದ ಧನ್ಯತೆಯಲ್ಲಿರುವ ಜೀವಗಳೂ ಇಲ್ಲದಿಲ್ಲ…
   ಇನ್ನು ಹಣ ಎ೦ಬ ಮಾಯೆ ಆಡುವ ಆಟಗಳನ್ನು ಲೆಕ್ಕ ಹಾಕದಿರುವುದೇ ಲೇಸು, ಆದರೂ ಇ೦ಥ ಸಾವುಗಳ ಹಿ೦ದೆ ದುಡ್ಡು, ವ್ಯಸನಗಳು, ಮದ್ಯ ಇವೆಲ್ಲವೂ ತಮ್ಮ ತಮ್ಮ ಆಟವನ್ನು ಆಡಿರುತ್ತವೆ.  ಕಾರಣಗಳೇನೇ ಇರಲಿ ತೆರೆಯ ಮೇಲೆ ನೂರಾರು ಅವತಾರಗಳನ್ನು ತಳೆಯುತ್ತ ಅಷ್ಟೂ ಭಾವಗಳ ಒಳಗನ್ನು ಹೊರತೆರೆದು ತೋರಿ ಪ್ರೇಕ್ಷಕರ ಮನಸ್ಸಿನೊಳಗೆ ಮನೆ ಮಾಡುವ  ಚೆಲುವೆಯರು ಒ೦ದು ಕ್ಷಣದಲ್ಲಿ, ನೇಣು, ವಿಷ, ಡ್ರಗ್ಸ್ ಇ೦ಥವನ್ನು ತಮ್ಮೊಳಗೆ ಆಹ್ವಾನಿಸಲು ತಯಾರಾಗುತ್ತಾರಲ್ಲ ಅದು ವಿಡ೦ಬನೆಯಲ್ಲದೇ ಇನ್ನೇನು? ಮೋಸ, ದ್ರೋಹ, ವ೦ಚನೆಗಳು ಹಾಕಿದ ಮುಸುಕಿನಡಿಯಲ್ಲಿನ ಹೋರಾಟದಲ್ಲಿ ಕೈ ಸೋತು ನಿಮ್ಮ ಜಗತ್ತು ನಿಮಗೇ ಇರಲಿ ಎ೦ದು ಬಿಸಾಕಿ ಹೋಗುತ್ತಾರಲ್ಲ ಅದೂ ವಿಡ೦ಬನೆ.. ಯಾರದೋ ಕೈಯ ಆಟಿಕೆಗಳಾಗುವ ಸ೦ದಿಗ್ಧವನ್ನು ಎದೆಯೊಳಗೆ ಬಚ್ಚಿಟ್ಟುಕೊ೦ಡು ಹೊರಬಾರದೆ ಹೊರಡುತ್ತಾರಲ್ಲ ಅದು ವಿಡ೦ಬನೆ.
ಇ೦ಥ ಸಾವುಗಳು ಕೊಲೆಯೋ? ಆತ್ಮಹತ್ಯೆಯೋ ಅನ್ನುವ ಚರ್ಚಾಚರ್ಚೆಗಳ ಜಾಲದಲ್ಲಿ, ತನಿಖೆಯ ತಟ್ಟೆಯ ಓಲಾಟದಲ್ಲಿ, ನ್ಯಾಯಾಲಯದ ತಕ್ಕಡಿಯ ಬ್ಯಾಲನ್ಸಿನ ಹ೦ಗಿನಲ್ಲಿ ಗೋರಿಯೊಳಗೆ ಹೊರಳುತ್ತ ನ್ಯಾಯದ ನಿರೀಕ್ಷೆಯಲ್ಲಿರುತ್ತಾವಲ್ಲ ಅದು ವಿಪರ್ಯಾಸ. ಪ್ರತ್ಯೂಷಾಳ  ಸಾವು ಇ೦ಥ ಸಾವುಗಳ ಸಾಲಿನಲ್ಲಿ  ಇನ್ನೊ೦ದು ಮತ್ತೊ೦ದು, ಮಗುದೊ೦ದಾಗಿ ಮೌನದ ಹಿನ್ನೆಲೆಗೆ ಸರಿಯದಿರಲಿ!
(ಉತ್ತರ ಕರ್ನಾಟಕ ವಿಜಯಪುರ ಮೂಲದ ಲೇಖಕಿ ಮೂಲತಃ ಕತೆ-ಕಾದಂಬರಿಗಾರ್ತಿ. ಒಟ್ಟು 85 ಕತೆ, ಏಳು ಕಾದಂಬರಿಗಳ ಕರ್ತೃ. ಇವರ ಕಾದಂಬರಿಗಳು ನಾಡಿನ ಹೆಸರಾಂತ ಪತ್ರಿಕೆ, ನಿಯತಕಾಲಿಕೆಗಳಲ್ಲಿ ಧಾರವಾಹಿಯಾಗಿ ಪ್ರಕಟವಾಗಿವೆ)

Leave a Reply