ಬರೀ ಪ್ರಾಮಾಣಿಕತೆಯ ಭಜನೆಯಲ್ಲ, ಪರಿಕರ್ ಅನ್ನೋದು ಪರಿಶ್ರಮದ ಮಾದರಿ!

New Delhi : Defence Minister Manohar Parrikar takes a look of a model of the heavy weight anti submarine torpedo Varunastra after it was handed over to the Indian Navy in New Delhi on Wednesday. PTI Photo by Shirish Shete (PTI6_29_2016_000101A)

ಡಿಜಿಟಲ್ ಕನ್ನಡ ಟೀಮ್:

ಕೇಂದ್ರ ರಕ್ಷಣಾ ಸಚಿವ ಮನೋಹರ್ ಪರಿಕರ್ ಮೊನ್ನೆ ಬೆಂಗಳೂರಿಗೆ ಆಗಮಿಸಿ, ಸಾಕಷ್ಟು ದಿನಗಳಿಂದ ಜೆ.ಸಿ ನಗರ ಸಮೀಪದ ಮಠದಹಳ್ಳಿಯ ಸರ್ಕಾರಿ ಶಾಲೆ ಹಾಗೂ ರಕ್ಷಣಾ ಇಲಾಖೆಗೆ ನಡುವೆ ಇದ್ದ ಭೂಮಿ ತಕರಾರನ್ನು ಬಗೆಹರಿಸಿದ್ರು. ಪರಿಣಾಮ ರಕ್ಷಣಾ ಇಲಾಖೆ ಜಮೀನಿನಲ್ಲಿದ್ದ ಶಾಲೆ ಅಸ್ತಿತ್ವ ಅಲ್ಲಿಯೇ ಉಳಿಯಿತು. ಇತ್ತ ನಗರದ ಹೊರವಲಯದಲ್ಲಿ ಸೇನೆಗೆ ಭೂಮಿ ನೀಡುವ ಪ್ರಸ್ತಾವಕ್ಕೆ ಒಪ್ಪಿಗೆ ಪಡೆಯಲಾಯಿತು. ಈ ವಿವಾದವೇನೂ ಇವತ್ತಿನದಾಗಿರಲಿಲ್ಲ. ಆದರೆ ಅದನ್ನ ಪರಿಹರಿಸುವುದಕ್ಕೆ ಖುದ್ದು ರಕ್ಷಣಾ ಸಚಿವರೇ ಬರಬೇಕಾಯಿತು.

ಶಾಲಾ ಆವರಣದಲ್ಲಿ ರಕ್ಷಣಾ ವಿಭಾಗ ಟೆಂಟ್ ಹಾಕಿದ್ದನ್ನು ವಿರೋಧಿಸಿ ಶಾಲೆಯ ಮೇಲ್ವಿಚಾರಕರು, ಪೊಷಕರು ಪ್ರತಿಭಟನೆ ನಡೆಸುತ್ತಿದ್ದರು. ಕೇಂದ್ರ ಕಾನೂನು ಸಚಿವ ಡಿ.ವಿ ಸದಾನಂದ ಗೌಡ ಮತ್ತು ಪರಿಕರ್ ಸಭೆ ನಡೆಸಿ, ಟೆಂಟ್ ಗಳನ್ನು ತೆರವುಗೊಳಿಸುವಂತೆ ಸೂಚನೆ ನೀಡಿ ಈ ವಿವಾದಕ್ಕೆ ತೆರೆ ಎಳೆದ್ರು. ಕೇವಲ ಶಾಲಾ ಜಾಗ ಅಷ್ಟೇ ಅಲ್ಲದೆ 16 ವಿವಿಧ ಕಾಮಗಾರಿಗಳಿಗೆ ಅಡ್ಡಿಯಾಗಿದ್ದ ಸುಮಾರು 38 ಎಕರೆ ಜಾಗವನ್ನು ಬಿಟ್ಟುಕೊಡಲು ರಕ್ಷಣಾ ಇಲಾಖೆ ನಿರ್ಧರಿಸಿದೆ. ಇದಕ್ಕೆ  ಪ್ರತಿಯಾಗಿ ಬೆಂಗಳೂರು ಹೊರ ವಲಯದಲ್ಲಿ ರಕ್ಷಣಾ ಇಲಾಖೆಗೆ 400 ಎಕರೆ ಜಾಗ ನೀಡಲು ರಾಜ್ಯ ಸರ್ಕಾರ ಒಪ್ಪಿದೆ.

ಇದೊಂದು ಉದಾಹರಣೆ ಮಾತ್ರ. ರಕ್ಷಣಾ ಇಲಾಖೆ ಸಾರಥ್ಯವನ್ನು ಪರಿಕರ್ ವಹಿಸಿಕೊಂಡ ಮೇಲೆ ನೆನೆಗುದಿಗೆ ಬಿದ್ದಿದ್ದ ಹಲವು ಯೋಜನೆಗಳು ತ್ವರಿತ ತಾರ್ಕಿಕ ಅಂತ್ಯಕ್ಕೆ ಬರುತ್ತಿವೆ. ಈ ಹಿಂದಿನ ರಕ್ಷಣಾ ಮಂತ್ರಿ ಎ. ಕೆ. ಆ್ಯಂಟನಿ ಪ್ರಾಮಾಣಿಕ ವರ್ಚಸ್ಸಿನವರೇನೋ ಹೌದು. ಆದರೆ ನಿರ್ಧಾರ ತೆಗೆದುಕೊಳ್ಳದಿರುವುದೇ ಒಳ್ಳೆತನ ಎಂಬ ನಿಲುವಿಗೆ ಜೋತು ಬಿದ್ದರು! ತತ್ಪರಿಣಾಮ ಸಮಸ್ಯೆ ಅಲ್ಲಿಯೇ ಉಳಿದಿತ್ತು.  ಆದರೆ, ನಿರ್ಥಾರ ತೆಗೆದುಕೊಳ್ಳುವುದರಲ್ಲೂ ಪ್ರಾಮಾಣಿಕತೆ ಇದೆ ಎಂಬುದನ್ನು ಪರಿಕ್ಕರ್ ತೋರಿಸಿಕೊಟ್ಟಿದ್ದಾರೆ. ಇದಿಷ್ಟೇ ಅಲ್ಲದೇ ರಕ್ಷಣಾ ಇಲಾಖೆಯಲ್ಲಿ ನೆನೆಗುದಿಗೆ ಬಿದ್ದಿದ್ದ ಹಲವು ಯೋಜನೆಗಳಿಗೆ ಪರಿಕರ್ ಮುಕ್ತಿ ನೀಡುತ್ತಾ ಬಂದಿದ್ದಾರೆ. ಅದಕ್ಕೆ ತಾಜಾ ಉದಾಹರಣೆಯಾಗಿ ನಿಲ್ಲೊದು 3 ದಶಕಗಳ ನಂತರ ಸ್ವದೇಶಿ ನಿರ್ಮಿತ ತೇಜಸ್ ಯುದ್ಧ ವಿಮಾನ ಭಾರತೀಯ ವಾಯು ಪಡೆಗೆ ಅಧಿಕೃತವಾಗಿ ಸೇರ್ಪಡೆಗೊಂಡದ್ದು. ಇದರ ಜೊತೆಗೆ ವೇಗ ಪಡೆದು ಅಂತ್ಯ ಕಂಡ ಯೋಜನೆಗಳು ಇಂತಿವೆ:

ನೌಕಾ ಸೇನೆ ವರುಣಾಸ್ತ್ರ

ವಾಯು ಸೇನೆಗೆ ತೇಜಸ್ ಹೇಗೆ ಪ್ರಮುಖವಾಗಿತ್ತೋ ಅಷ್ಟೇ ಮಹತ್ವವಾದದ್ದು ನೌಕಾಪಡೆಗೆ ಸೇರ್ಪಡೆ ಆದ ‘ವರುಣಾಸ್ತ್ರ’. ಇದು ಜಲಾಂತರ್ಗಾಮಿ (ಸಬ್ ಮರೀನ್ಸ್) ಗಳನ್ನು ಉಡಾಯಿಸುವ ನೌಕಾ ಸ್ಫೋಟಕ.

ಈ ‘ವರುಣಾಸ್ತ್ರ’ ನಿನ್ನೆ ಮೊನ್ನೆಯ ಯೋಜನೆಯಲ್ಲ. ಸುಮಾರು ದಶಕದ ಹಿಂದಿನದು. ವಿನ್ಯಾಸ ಹಾಗೂ ತಾಂತ್ರಿಕ ಸಮಸ್ಯೆಗಳೊಡನೆ ಆಮೆಗತಿಯಲ್ಲಿ ಸಾಗಿತ್ತು. ಡಿಆರ್ ಡಿಒ ನ ಪ್ರಾಥಮಿಕ ಪ್ರಯೋಗಾಲಯಗಳಲ್ಲಿ ಒಂದಾದ ನಾವೆಲ್ ಸೈನ್ಸ್ ಅಂಡ್ ಟೆಕ್ನಾಲಜಿ ಲ್ಯಾಬೊರೆಟರಿ ಅದೆಲ್ಲವನ್ನು ಪರಹರಿಸಿ ‘ವರುಣಾಸ್ತ್ರ’ವನ್ನು ಕಳೆದು ಜೂನ್ 26 ರಂದು ನೌಕಾಪಡೆಗೆ ಹಸ್ತಾಂತರಿಸಿದೆ. ಶೇ. 95 ರಷ್ಟು ಸ್ವದೇಶಿ ನಿರ್ಮಿತ ಎಂಬ ಖ್ಯಾತಿಗೂ ಇದು ಭಾಜನವಾಗಿದೆ. 250 ಕೆ.ಜಿ ಯಷ್ಟು ಸ್ಫೋಟಕವನ್ನು ಹೊಂದಿದ್ದು ಗಂಟೆಗೆ 40 ಮೈಲು ವೇಗದಲ್ಲಿ ಸಾಗುವ ವರುಣಾಸ್ತ್ರದ ಒಟ್ಟು ತೂಕ 1.25 ಟನ್. ಇದರ ಅಳವಡಿಕೆಯಿಂದ ಭಾರತೀಯ ನೌಕಾ ಸೇನೆ ಬತ್ತಳಿಕೆಯ ಸಾಮರ್ಥ್ಯ ಹೆಚ್ಚಿದೆ.

ನೀಗುತ್ತಿದೆ ಫಿರಂಗಿ ಬರ

ಭಾರತ 1987 ರ ಬೊಪೋರ್ಸ್ ಹಗರಣದ ನಂತರ ಒಂದೇ ಒಂದು ಫಿರಂಗಿ ಖರೀದಿ ಆಗಿರಲಿಲ್ಲ. ಅಲ್ಲಿಗೆ ಭಾರತ ಹೊಸ ಫಿರಂಗಿಗಳನ್ನು ತನ್ನ ಬತ್ತಳಿಕೆಗೆ ಸೇರಿಸಿಕೊಂಡು 3 ದಶಕಗಳೇ ಕಳೆದಿತ್ತು. ಸೇನೆ ಕ್ರಿಯಾ ಮಂಡಳಿ (DAC) ಇತ್ತೀಚೆಗೆ ನಡೆಸಿದ ಸಭೆಯಲ್ಲಿ 145 ಎಂ-777 ಲೈಟ್ ಗನ್ಸ್ ಎಂಬ ಫಿರಂಗಿಗಳನ್ನು ಅಮೆರಿಕದಿಂದ ಖರೀದಿಸಲು ಒಪ್ಪಿಗೆ ನೀಡಿದೆ. ಇದರಿಂದ ಭಾರತೀಯ ಸೇನೆಯನ್ನು ಕಾಡುತ್ತಿದ್ದ ಫಿರಂಗಿಗಳ ಬರ ನಿವಾರಣೆ ಆಗಲಿದೆ. ಈ ಫಿರಂಗಿಗಳನ್ನು ಚೀನಾ ಗಡಿ ಭಾಗಗಳಲ್ಲಿ ನಿಯೋಜಿಸಲು ನಿರ್ಧರಿಸಲಾಗಿದೆ. ಸುಮಾರು 750 ಮಿಲಿಯನ್ ಅಮೆರಿಕನ್ ಡಾಲರ್ ಗೆ ಈ ಖರೀದಿ ನಿಗದಿಯಾಗಿದೆ. ಈ ಯೋಜನೆಯಲ್ಲಿ 25 ಫಿರಂಗಿಗಳನ್ನು ಅಮೆರಿಕ ನೇರವಾಗಿ ಕಳುಹಿಸಲಿದ್ದು, ಉಳಿದವುಗಳನ್ನು ಭಾರತದಲ್ಲೇ ಜೋಡಿಸಲಾಗುವುದು.

ಅಮೆರಿಕದಿಂದ ಖರೀದಿಸುವುದರ ಜತೆಗೆ ಸ್ವದೇಶಿ ನಿರ್ಮಿತ ಫಿರಂಗಿ ‘ಧನುಶ್’ ಈಗಾಗಲೆ ಸೇನೆಗೆ ಸೇರ್ಪಡೆಯಾಗಿದೆ. ಧನುಶ್ 3 ದಶಕಗಳ ಹಳೆಯ ಯೋಜನೆಯಾದರೂ ಅಂತಿಮ ರೂಪ ಪಡೆದಿದ್ದು ಈಗಷ್ಟೆ. ಜೂನ್ ಅಂತ್ಯದಲ್ಲಿ ಪ್ರತ್ಯೇಕ ವಿನ್ಯಾಸದ 3 ಫಿರಂಗಿಗಳನ್ನು  ಸೇನೆಗೆ ನೀಡಲಾಗಿದ್ದು, ಸೆಪ್ಟೆಂಬರ್ ವೇಳೆಗೆ ಮತ್ತೆ ಮೂರು ಸೇರ್ಪಡೆಯಾಗಲಿವೆ. ನಂತರದ ದಿನಗಳಲ್ಲಿ ಇದರ ಉತ್ಪಾದನೆ ಮತ್ತು ಅಳವಡಿಕೆ ಸಂಖ್ಯೆ ಹೆಚ್ಚಲಿದೆ. ಆರಂಭದಲ್ಲಿ ಇದರ ಗುಂಡು 27 ಕಿ.ಮೀ ದೂರ ಸಾಗುವ ಸಾಮರ್ಥ್ಯ ಹೊಂದಿತ್ತಾದರೂ, ಈಗ ಅದನ್ನು 38 ಕಿ.ಮೀಗೆ ವಿಸ್ತರಿಸಲಾಗಿದೆ.

ರಕ್ಷಣೆ ಕ್ಷೇತ್ರದಲ್ಲಿ ಶೇ. 100 ವಿದೇಶಿ ಬಂಡವಾಳ ಹೂಡಿಕೆಗೆ ಅನುಮತಿ ಸಿಕ್ಕಿರುವಾಗಲೇ ದೇಶಿ ರಕ್ಷಣಾ ಉದ್ಯಮವೂ ಚಿಗಿತುಕೊಳ್ಳುತ್ತಿರುವುದು ಗಮನಾರ್ಹ ಸಂಗತಿ. ಇದರ ಹಿಂದಿರುವ ಮನೋಹರ್ ಪರಿಕರ್ ಪರಿಶ್ರಮ ಪ್ರಶಂಸಾರ್ಹ.

Leave a Reply