ಅನ್ವೇಷಕರ ನಾಡು ಪೋರ್ಚುಗಲ್!

ಲಿಸ್ಬನ್ ನಗರ…

authors-rangaswamyವಿಸ್ತೀರ್ಣದಲ್ಲಿ ಕರ್ನಾಟಕದ ಅರ್ಧ ಇರುವ ಯೂರೋಪಿನ ಅತಿ ಹಳೆಯ ದೇಶ ಎನ್ನುವ ಮಾನ್ಯತೆಗೆ ಭಾಜನವಾಗಿರುವ ಪೋರ್ಚುಗಲ್ ನ ಜನಸಂಖ್ಯೆ ಒಂದು ಕೋಟಿ ಮೂವತ್ತು ಲಕ್ಷದಷ್ಟು. ಸ್ಪೇನ್ ದೇಶದ ಜೊತೆಗೆ ಉತ್ತರದಲ್ಲಿ 750 ಮೈಲಿಗೂ ಹೆಚ್ಚು ಉದ್ದದ ಗಡಿ ಹಂಚಿಕೊಂಡಿದೆ. ಗಡಿಭಾಗದಲ್ಲಿ ಯಾವುದೇ ತಂಟೆ ತಕರಾರು ಇಲ್ಲದೆ ಶಾಂತಿಯಿಂದ ಕೂಡಿದೆ. ಗಡಿ ಭಾಗದ ಒಂದೆರೆಡು ಹಳ್ಳಿಗಳು ನಮಗೆ ಸೇರಬೇಕು ಎನ್ನುವುದು ಪೋರ್ಚುಗೀಸ್ ವಾದ 19 ನೇ ಶತಮಾನದಿಂದ ಸ್ಪೇನ್ ಆಳ್ವಿಕೆಗೆ ಒಳಪಟ್ಟ್ಟಿರುವ ಈ ಹಳ್ಳಿಗಳನ್ನು ಪಡೆಯಲೇಬೇಕು ಎಂದು ಪೋರ್ಚುಗೀಸ್ ಎಂದೂ ಯುದ್ಧಕ್ಕೆ ನಿಂತಿಲ್ಲ ಮಾತುಕತೆ ಸಾಗುತ್ತಲೇ ಇದೆ. ಲಿಸ್ಬನ್ ಪೋರ್ಚುಗೀಸ್ ದೇಶದ ರಾಜಧಾನಿ. ಹಾಗೆ ನೋಡಲು ಹೋದರೆ ಇತಿಹಾಸದಲ್ಲಿ ಲಿಸ್ಬನ್ ಅನ್ನು ಎಂದೂ ಪೋರ್ಚುಗೀಸ್ ನ ರಾಜಧಾನಿ ಎಂದು ಉಲ್ಲೇಖಿಸಿಲ್ಲ. ಕಾರ್ಯತಃ (De Facto) ಇದನ್ನು ರಾಜಧಾನಿ ಎಂದು ಎಂದು ಶತಮಾನಗಳಿಂದ ಒಪ್ಪಿಕೊಳ್ಳಲಾಗಿದೆ. ಅದಕ್ಕೆಂದು ಅದ್ಧೂರಿ ಸಮಾರಂಭ ನಡೆದಿಲ್ಲ. ಪೋರ್ಚುಗೀಸ್ ಬದುಕಲು ಉತ್ತಮ ದೇಶ ಎನ್ನುವುದು ಆ ದೇಶದಲ್ಲಿ ಅನೇಕ ಗ್ರಾಹಕರನ್ನ ಹೊಂದಿದ್ದ ಮತ್ತು ಕೆಲಸದ ವಿಷಯವಾಗಿ ಹಲವು ಪೋರ್ಚುಗೀಸರೊಡನೆ ಮಾತನಾಡುವ ಅವಕಾಶ ಸಿಕ್ಕ ನನಗೆ ಗೊತ್ತಿತ್ತು. ಆದರೆ ಕುಟುಂಬ ಸಮೇತ ಹೋಗಬೇಕು ಅಲ್ಲಿಗೆ ಹೋಗಬೇಕು ಅನ್ನಿಸಿದ್ದು ಮಾತ್ರ ವಾಸ್ಕೊಡ ಗಾಮ ಎನ್ನುವ ನಾವಿಕನಿಂದ!.

ಇಂದಿನ ಜಗತ್ತು ಒಂದು ಸಣ್ಣ ಹಳ್ಳಿಯಂತೆ ಮಾರ್ಪಾಡಾಗಲು ವಾಸ್ಕೊ ದ ಗಾಮ (Vasco da Gama) ಮತ್ತು ಬಾರ್ತಲೋಮಿಯ ದಿಯಾಸ್ (Bartolomeu Dias) ಎನ್ನುವ ಇಬ್ಬರು ಪೋರ್ಚುಗೀಸ್ ನಾವಿಕರು ಕಾರಣ ಎನ್ನುವುದನ್ನು ಎಲ್ಲರು ಒಪ್ಪಲೇಬೇಕಾಗಿರುವ ವಿಷಯ. ವಾಸ್ಕೊ ದ ಗಾಮ ಭಾರತವನ್ನು ಮತ್ತು ಬ್ರೆಜಿಲ್ ದೇಶವನ್ನು ಕಂಡು ಹಿಡಿದದ್ದು ನಂತರ ಜಗತ್ತಿನಲ್ಲಿ ಆದ ಬದಲಾವಣೆಗೆ ಇತಿಹಾಸ ಸಾಕ್ಷಿ. ಹೀಗೆ ಜಗತ್ತಿನ ಅತ್ಯಂತ ಮಹತ್ವಪೂರ್ಣ ದೇಶಗಳ ಕಂಡು ಹಿಡಿದ ನಾವಿಕರ ದೇಶ ಹೇಗಿದೆ ಎನ್ನುವ ಸಹಜ ಕುತೂಹಲ ನನ್ನ ಲಿಸ್ಬನ್ ನಗರದಲ್ಲಿ ತಂದು ನಿಲ್ಲಿಸಿತ್ತು.

ಲಿಸ್ಬನ್ ನ ಹೂಂಬೆರ್ತೊ ಡೆಲ್ಗಾದೊ ಏರ್ಪೋರ್ಟಿನಲ್ಲಿ ಇಳಿದು ನಾನು ಕಾದಿಸಿರಿದ್ದ ಹೋಟೆಲ್ ಗೆ ಹೋಗಲು ಟ್ಯಾಕ್ಸಿ ಹಿಡಿದೆವು. ಯೂರೋಪಿನ ಯಾವುದೇ ದೇಶಕ್ಕೆ ಹೋಗಲಿ ‘ನಿಮಗೆ ಸ್ಪ್ಯಾನಿಷ್ ಬರುತ್ತದೆಯೇ’ ? ಎಂದು ಕೇಳುವುದು ನನ್ನ ಜಾಯಮಾನ ಅವರಿಗೆ ಸ್ಪ್ಯಾನಿಷ್ ಬಂದರೆ ಅವರೊಂದಿಗೆ ಸಂವಹನ ಸುಲಭ. ಮುಕ್ಕಾಲು ಪಾಲು ಯೂರೋಪಿನ ದೇಶಗಳಿನ ಜನರಿಗೆ ಇಂಗ್ಲಿಷ್ ಎಂದರೆ ಅಲರ್ಜಿ. ಜೊತೆಗೆ ತಾತ್ಸಾರ! ನನ್ನ ಟ್ಯಾಕ್ಸಿ ಡ್ರೈವರ್ ಅನ್ನು ಹಾಗೆಯೇ ನಿನಗೆ ಸ್ಪ್ಯಾನಿಷ್ ಬರುತ್ತದೆಯೇ ಎಂದೇ.. ಆತ ಗತ್ತಿನಿಂದ ‘ಸೊಯ್ ಪೋರ್ಚುಗೀಸ್….’ (ನಾನು ಪೋರ್ಚುಗೀಸ) ಎಂದ. ಸ್ಪ್ಯಾನಿಷ್ ಮತ್ತು ಪೋರ್ಚುಗೀಸ್ ಕನ್ನಡ ತೆಲುಗು ಇದ್ದಹಾಗೆ. ಮುಕ್ಕಾಲು ಪಾಲು ಪದಗಳು ಹೋಲಿಕೆ ಇದೆ. ನನ್ನ ಸ್ಪ್ಯಾನಿಷ್ ಮಿಶ್ರಿತ ಪೋರ್ಚುಗೀಸ್ ನಲ್ಲಿ ಹೇಗೂ ಸಂಭಾಳಿಸಿದೆ. ನಾನು ನನ್ನ ದೇಶ ಎನ್ನುವ ಭಾವನೆ ಅದೆಷ್ಟು ಇವರ ರಕ್ತದಲ್ಲಿದೆ ಎನ್ನುವುದಕ್ಕೆ ಈ ವಿಷಯವನ್ನು ಉಲ್ಲೇಖಿಸಬೇಕಾಯಿತು.

ಲಿಸ್ಬನ್ ನಲ್ಲಿ ನೋಡಲೇನಿದೆ:

ಬೆಲಂ ಟವರ್ ಇಲ್ಲಿನ ಆಕರ್ಷಣೆ. ಇದು ಡಿಫೆನ್ಸ್ ಟವರ್ ಎಂದು ಕೂಡ ಪ್ರಸಿದ್ದಿ ಹೊಂದಿದೆ. ಜೆರೋಮಿನಸ್ ಮೊನೆಸ್ಟರಿ (ವಾಸ್ಕೋ ದ ಗಾಮನ ತಂಗುದಾಣವಾಗಿತ್ತು) ಹತ್ತಾರು ಮ್ಯೂಸಿಯಂ ಗಳು ಕೋಟೆಗಳು ನೋಡಲು ಸಿಗುತ್ತವೆ. ಎಲ್ಲಕ್ಕೂ ಮುಖ್ಯ ಟ್ರಾಮ್ ಪ್ರಯಾಣಕ್ಕೆ ಇಲ್ಲಿಗೆ ಬರುವ ಪ್ರವಾಸಿಗರು ಮುಗಿ ಬೀಳುತ್ತಾರೆ ಅದಕ್ಕೆ ಕಾರಣ ಇವು 1930 ರಿಂದ ಚಾಲನೆಯಲ್ಲಿವೆ. ಟ್ರಾಮ್ 28 ಎನ್ನುವ ಟ್ರಾಮ್ ತಗ್ಗು ದಿಣ್ಣೆಯ ಲಿಸ್ಬನ್ ನಲ್ಲಿ ಚಲಿಸುವ ಮಜಾವನ್ನ್ ಅದರಲ್ಲಿ ಸವಾರಿ ಮಾಡಿಯೇ ಅನುಭವಿಸಬೇಕು.

ಬೆಲಂ ಟವರ್
ಬೆಲಂ ಟವರ್

ಒಂದಷ್ಟು ಚಕಿತಗೊಳಿಸುವ ಸಂಗತಿಗಳು

  • ಪೋರ್ಚುಗೀಸರು ಭಾರತೀಯರಂತೆ ಹಣೆಬರಹ (Destiny) ದ ಮೇಲೆ ಬಹಳ ನಂಬಿಕೆಯುಳ್ಳವರು. ನಮ್ಮಲ್ಲಿ ಅನೇಕ ರಾಗಗಳಿರುವಂತೆ ಪೋರ್ಚುಗೀಸರ ಒಂದು ಹಾಡಿನ ಪ್ರಕಾರಕ್ಕೆ ಫಾದೋ (fado) ಎನ್ನುವ ಹೆಸರಿದೆ. ಇದರರ್ಥ ಯಾರೊಬ್ಬರೂ ತಮ್ಮ ಹಣೆಬರದಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ (one’s fate or destiny cannot be escaped) ಎನ್ನುವುದೇ ಆಗಿದೆ.
  • ಪೋರ್ಚುಗಲ್ ಅತಿ ಹೆಚ್ಚು ವರ್ಷ ಮತ್ತು ಅತಿ ಕಡಿಮೆ ಸಮಯ ರಾಜರನ್ನು ಹೊಂದಿದ ದೇಶವಾಗಿದೆ. ಪೋರ್ಚುಗಲ್ ಪ್ರಥಮ ರಾಜ ಅಲ್ಫೋನ್ಸೋ 73 ವರ್ಷ 220 ದಿನಗಳ ಕಾಲ ಈ ದೇಶದ ರಾಜನಾಗಿದ್ದ. 1908 ರಲ್ಲಿ ಈ ದೇಶದ ಉತ್ತರಾಧಿಕಾರಿ ಕಾರ್ಲೋಸ್ ಇಪ್ಪತ್ತು ನಿಮಿಷಗಳ ಕಾಲ ರಾಜ ಪದವಿ ಹೊಂದಿದ್ದ.
  • ಯೂರೋಪಿನ ಅತ್ಯಂತ ಹಳೆಯದ ದೇಶ ಎನ್ನುವ ಖ್ಯಾತಿ ಪೋರ್ಚುಗಲ್ಲಿಗೆ ಸೇರುತ್ತದೆ.
  • ಯೂರೋಪಿನಲ್ಲಿ ಅತಿ ಹೆಚ್ಚು ಸಮಯ ಸರ್ವಾಧಿಕಾರಿ ಆಡಳಿತ ಹೊಂದಿದ್ದ ದೇಶ ಎನ್ನುವ ಕುಖ್ಯಾತಿಗೂ ಈ ದೇಶ ಪ್ರಸಿದ್ಧ. 1926 ರಿಂದ 1974 ರವರೆಗೆ ಸರ್ವಾಧಿಕಾರಿ ಆಳ್ವಿಕೆಗೆ ಪೋರ್ಚುಗಲ್ ಒಳಪಟ್ಟಿತ್ತು.
  • ಜಗತ್ತಿನ ಪ್ರಸಿದ್ಧ ಅನ್ವೇಷಕರ ಹೆಸರು ಹೇಳಿ ಎಂದರೆ ಮೊದಲು ನೆನಪಿಗೆ ಬರುವ ಹಲವು ಹೆಸರನ್ನು ಕೊಟ್ಟ ದೇಶವಿದು. ಪೋರ್ಚುಗೀಸರು ಮೂಲತಃ ಸಾಹಸಿಗಳು ಅನ್ವೇಷಕರು.
  • ಇವರ ಅನ್ವೇಷಣೆಯ ಗುರುತಾಗಿ 53 ದೇಶಗಳಲ್ಲಿ 600 ವರ್ಷಕ್ಕೂ ಮೀರಿ ಇವರು ಆಳ್ವಿಕೆ ನಡೆಸಿದ್ದಾರೆ. ತಮ್ಮ ಅಧೀನದಲ್ಲಿದ್ದ ದೇಶಗಳಿಗೆ ಪೋರ್ಚುಗೀಸ್ ಸ್ವಂತಂತ್ರ ನೀಡುತ್ತಾ ಬಂದಿತು. ಇತ್ತೀಚಿಗೆ ಅಂದರೆ 1999 ರಲ್ಲಿ ಮಕಾವು ಅನ್ನು ಚೀನಾ ದೇಶಕ್ಕೆ ಬಿಟ್ಟು ಕೊಟ್ಟಿತು.
  • ಪೋರ್ಚುಗಲ್ ಹೊರತುಪಡಿಸಿ ಜಗತ್ತಿನ ಇತರ ೮ ದೇಶಗಲ್ಲಿ ಪೋರ್ಚುಗೀಸ್ ಆಡು ಭಾಷೆಯಾಗಿದೆ. ಜಗತ್ತಿನಲ್ಲಿ ಅತಿ ಹೆಚ್ಚು ಬಳಸಲ್ಪಟ್ಟ ಭಾಷೆಯಲ್ಲಿ ಪೋರ್ಚುಗೀಸ್ ಗೆ ಆರನೇ ಸ್ಥಾನ!
  • ಲಿಸ್ಬನ್ ನಗರ ರೋಮ್ ನಗರಕ್ಕಿಂತ ಹಳೆಯದು. ಪೋರ್ಚುಗೀಸ್ ನಲ್ಲಿ 80 ಕ್ಕೂ ಅಧಿಕ ಜನ ರೋಮನ್ ಕ್ಯಾಥೋಲಿಕ್ ಧರ್ಮಕ್ಕೆ ಸೇರಿದವರು.
  • ಜಗತ್ ಪ್ರಸಿದ್ಧ ಫುಟ್ಬಾಲ್ ಆಟಗಾರ ಕ್ರಿಸ್ಟಿಯಾನೊ ರೊನಾಲ್ಡೊ ಪೋರ್ಚುಗೀಸ್ ಪ್ರಜೆ.
  • ಇಲ್ಲಿನ ಹೆಂಗಸರು ಗಂಡಸರಿಗಿಂತ ಐದರಿಂದ ಆರು ವರ್ಷ ಹೆಚ್ಚು ಬದುಕುತ್ತಾರೆ. ಸರಾಸರಿ 84 ವರ್ಷ ಮಹಿಳೆಯರ ಜೀವಿತಾವಧಿ. ಇತರ ಯೂರೋಪಿಯನ್ ದೇಶಗಳಿಗೆ ಹೋಲಿಸಿದರೆ ಈ ರೀತಿ ಜೀವಿತಾವಧಿ ವ್ಯತ್ಯಾಸ ಇಲ್ಲಿ ಹೆಚ್ಚು.
  • ತಾಗುಸ್ ನದಿಯ ಮೇಲೆ ಕಟ್ಟಿರುವ ವಾಸ್ಕೋ ದ ಗಾಮ ಬ್ರಿಡ್ಜ್  ಯೂರೋಪಿನಲ್ಲೇ ಅತಿ ಉದ್ದವಾದದ್ದು. ಇದರ ಉದ್ದ ಸರಿಸುಮಾರು ಹತ್ತು ಮೈಲಿ.
  • ಜಗತ್ತಿನ ಅತಿ ಹಳೆಯ ಒಪ್ಪಂದ ಪೋರ್ಚುಗಲ್ ಮತ್ತು ಇಂಗ್ಲೆಂಡ್ ನಡುವೆ ಇದ್ದು ಇಂದಿಗೂ ಅದು ಚಾಲನೆಯಲ್ಲಿರುವುದು ವಿಶೇಷ. ಈ ಒಪ್ಪಂದ 1373 ನೇ ಇಸವಿಯಲ್ಲಿ ಮಾಡಿಕೊಂಡ ರಾಜಕೀಯ ಒಪ್ಪಂದವಾಗಿದೆ!
  • ಪೋರ್ಚುಗಲ್ ದೇಶ ರಿನ್ಯೂವೆಬಲ್ (ನವೀಕರಿಸಲ್ಪಡುವ) ಇಂಧನ ಉತ್ಪತ್ತಿಯಲ್ಲಿ ಜಗತ್ತಿನ ಅಗ್ರಗಣ್ಯ ಸ್ಥಾನದಲ್ಲಿದೆ. ತಮಗೆ ಬೇಕಾದ ಇಂಧನದ 70 ಕ್ಕೂ ಹೆಚ್ಚು ಇವರು ರಿನ್ಯೂವೆಬಲ್ ಎನರ್ಜಿ ಮೂಲಕ ಪಡೆಯುತ್ತಾರೆ. ಆ ಮೂಲಕ ಜಾಗತಿಕ ತಾಪಮಾನ ತಗ್ಗಿಸುವ ನಿಟ್ಟಿನಲ್ಲಿ ಪ್ರಥಮ ಹೆಜ್ಜೆ ಇಟ್ಟಿದೆ.
vasco-de-gama-lisboa-min
ವಾಸ್ಕೋ ದ ಗಾಮ ಬ್ರಿಡ್ಜ್

ಇತರೆ ಯೂರೋಪಿಯನ್ ದೇಶಗಳಿಗೆ ಹೋಲಿಸಿದರೆ ಪೋರ್ಚುಗಲ್ ತುಂಬಾ ಅಗ್ಗ. ಹೀಗಾಗಿ ಜೇಬಿಗೆ ಹೆಚ್ಚು ಬಾರವಿಲ್ಲದೆ ಸುತ್ತಬಹುದಾದ ದೇಶಗಳ ಪಟ್ಟಿಗೆ ಪೋರ್ಚುಗಲ್ ದೇಶವನ್ನು ಸಲೀಸಾಗಿ ಸೇರಿಸಬಹದು. ವಾರ ಪೂರ್ತಿ ಅವರ ಆತಿಥ್ಯ ಸವೆದು ಅವರಿಗೆ ಒಬ್ರೇಗಾದೊ (ಧನ್ಯವಾದ) ಜೊತೆಗೆ ತ ಚೌ ( ಬೈ) ಹೇಳಿ ಹೊರೆಟೆವು.

(ಗೂಗಲ್ ಚಿತ್ರಗಳು…)

Leave a Reply