ಪ್ರಕಾಶ್ ರೈ ಮಾನ ಕೇವಲ 1 ರೂ. ಅಷ್ಟೇನಾ?

ಡಿಜಿಟಲ್ ಕನ್ನಡ ಟೀಮ್:

ಮೈಸೂರು ಕೊಡಗು ಕ್ಷೇತ್ರದ ಬಿಜೆಪಿ ಸಂಸದ ಪ್ರತಾಪ್ ಸಿಂಹ ವಿರುದ್ದ ಬಹುಭಾಷಾ ನಟ ಪ್ರಕಾಶ್ ರೈ ಮಾನಹಾನಿ ಪ್ರಕರಣ ದಾಖಲು ಮಾಡಿದ್ದರು. ನಿನ್ನೆ ಕೋರ್ಟ್‌ಗೆ ಹಾಜರಾಗಿದ್ದ ನಟ ಪ್ರಕಾಶ್ ರೈ, ನೋಟಿಸ್‌ಗೆ ಉತ್ತರ ಕೊಡದ ಹಿನ್ನೆಲೆಯಲ್ಲಿ ಮಾನಹಾನಿ ಪ್ರಕರಣ ದಾಖಲಿಸುತ್ತಿದ್ದೇನೆ. ಅದೂ ಕೇವಲ 1 ರೂಪಾಯಿ ಮಾನಹಾನಿ ಪರಿಹಾರ ಕೇಳುತ್ತಿದ್ದೇನೆ ಎಂದಿದ್ದರು. ಇದೀಗ ಸಂಸದ ಪ್ರತಾಪ್ ಸಿಂಹ ವಾಗ್ದಾಳಿ ಮಾಡಿದ್ದು, ಸಮಾಜದಲ್ಲಿ ಪ್ರಕಾಶ್ ರೈ ಅವರ ಮಾನ ಮರ್ಯಾದೆಗೆ ಇರುವ ಮೌಲ್ಯ ಕೇವಲ 1 ರೂಪಾಯಿ ಮಾತ್ರ. ಈ ಸತ್ಯವನ್ನ ಪ್ರಕಾಶ್ ರೈ ನ್ಯಾಯಾಲಯದಲ್ಲಿ ಒಪ್ಪಿಕೊಂಡಿದ್ದಾರೆ ಹಾಗಾಗಿ ನಾನು ಪ್ರಕಾಶ್ ರೈ ಅವರನ್ನ ತುಂಬು ಹೃದಯದಿಂದ ಅಭಿನಂದಿಸುತ್ತೇನೆ ಎಂದು ತಿರುಗೇಟು ನೀಡಿದ್ದಾರೆ. ಸಮಾಜದಲ್ಲಿ ಅವರ ನಡವಳಿಕೆಗೆ 3 ಕಾಸಿನ ಬೆಲೆ ಇಲ್ಲ. 1 ರೂಪಾಯಿ ಮಾನ ಹಾನಿ ಕೇಳಿದ್ದೂ ಕೂಡ ಜಾಸ್ತಿ ಆಯ್ತು ವ್ಯಂಗ್ಯವಾಡಿದ್ದಾರೆ.

ನಟ ಪ್ರಕಾಶ್ ರೈ ನಿಜ ಜೀವನದಲ್ಲೂ ಕಳನಾಯಕರಾಗಿದ್ದು, ಅವರ ನಿಲುವುಗಳಲ್ಲಿ ಸ್ಪಷ್ಟತೆ ಇಲ್ಲ. ಪ್ರಕಾಶ್ ರಾಜ್ ಹೆಸರಿನಲ್ಲಿ ನೋಟೀಸ್ ನೀಡಿದ್ರು. ಆದ್ರೀಗ ಮೈಸೂರಿಗೆ ಬಂದು ಪ್ರಕಾಶ್ ರೈ ಹೆಸರಿನಲ್ಲಿ ಕೇಸ್ ಹಾಕಿದ್ದಾರೆ. ಇದರೊಂದಿಗೆ ಅವರ ದ್ವಂದ್ವ ಮನಸ್ಥಿತಿ ಬಹಿರಂಗವಾಗಿದೆ ಎಂದಿದ್ದಾರೆ. ನಮ್ಮ ಕಡೆ ಬೊಟ್ಟು ಮಾಡಿ ಇಂಥವರಿಗೆ ಓಟು ಹಾಕಬೇಡಿ ಅಂತೀರಲ್ಲ, ಬೆಂಗಳೂರಿನ 28 ಕ್ಷೇತ್ರಗಳಲ್ಲಿ ಎಲ್ಲಾದ್ರೂ ಚುನಾವಣೆಗೆ ನಿಲಿ, ನಿಮ್ಮನ್ನ ಸೋಲಿಸಿ ಕಳುಹಿಸ್ತಿವಿ ಅಂತಾ ಸವಾಲು ಹಾಕಿದರು. ನೀವು ಓಟು ಹಾಕಬೇಡಿ ಅಂತ ಹೇಳಿದ ತಕ್ಷಣ ಜನ ನಿಮ್ಮ ಮಾತನ್ನ ಕೇಳಲ್ಲ ಅಂತಾನೂ ಪ್ರತಾಪ್ ಮಾಡಿದರು.

ನಟ ಪ್ರಕಾಶ್ ರೈ ಮಾನಹಾನಿ ಕೇಸಿನಲ್ಲಿ ಪರಿಹಾರವಾಗಿ 1 ರೂಪಾಯಿ ಮಾತ್ರ ಹಾಕಿದ್ದಾರೆ. ಇದು ಅವರ ಮಾನಕ್ಕೆ ಇರುವ ಬೆಲೆ ಅಂತಾ ಬಿಜೆಪಿ ಸಂಸದ ವಾಗ್ದಾಳಿ ಮಾಡಿದ್ದಾರೆ. ಆದ್ರೆ ನಟ ಪ್ರಕಾಶ್ ರೈ ಪ್ರಕಾರ ಒಂದು ರೂಪಾಯಿ ಭಾರೀ ಅರ್ಥವಿದೆ. ಯಾಕಂದ್ರೆ ನಾನು ಸಮಾಜದಲ್ಲಿ ಸಾಕಷ್ಟು ಹೆಸರು ಮಾಡಿರುವ ವ್ಯಕ್ತಿ, ಆದ್ರೆ ಈ ವ್ಯಕ್ತಿ ಸಮಾಜದಲ್ಲಿ ನನಗಿರುವ ಮರ್ಯಾದೆ ಶೇ.1ರಷ್ಟು ಹಾಳು ಮಾಡಿದ್ದಾರೆ. ಹಾಗಾಗಿ ನನಗೆ ಒಂದು ರೂಪಾಯಿ ಭಾಗದಲ್ಲಿ ಮಾನಹಾನಿ ಆಗಿರುವ ಕಾರಣ ಒಂದು ರೂಪಾಯಿ ಪರಿಹಾರ ಸಾಕು ಎನ್ನುವುದಾಗಿದೆ. ಮಾನಹಾನಿಯಿಂದ ಹಣ ಪಡೆಯುವ ಉದ್ದೇಶ ನಟ ಪ್ರಕಾಶ್ ರೈರದ್ದಾಗಿಲ್ಲ. ಬದಲಿಗೆ 1 ರೂಪಾಯಿ ಮಾನಹಾನಿ ಕೇಸ್ ಹಾಕಿ ಕೋರ್ಟ್ ಕಟಕಟೆಗೆ ತಂದು ನಿಲ್ಲಿಸೋದು ಪ್ರಕಾಶ್ ರೈ ಅವರ ನಿಲುವಾಗಿದೆ.

Leave a Reply