ಬಾಡಿಗೆಗೆ ಸಿಗ್ತಾರೆ ಬಾಯ್ ಫ್ರೆಂಡ್ಸ್! ಭಾರತದಲ್ಲೂ ಇದು ಸಾಧ್ಯವಾ? ಅನ್ನೋರು ಈ ಸುದ್ದಿ ನೋಡಿ!

ಡಿಜಿಟಲ್ ಕನ್ನಡ ಟೀಮ್:

ಬಾಡಿಗೆಗೆ ಬಾಯ್ ಫ್ರೆಂಡ್… ಸಿನಿಮಾಗೆ ಮಾತ್ರ ಸೀಮಿತವಾಗಿದ್ದ ಈ ಪರಿಕಲ್ಪನೆ ಈಗ ವಾಸ್ತವಿಕ ಜೀವನದಲ್ಲೂ ನಿಜವಾಗಿದೆ. ಹೌದು, ನಂಬಲು ಕಷ್ಟ ಅನಿಸಿದರೂ ಇದು ನಿಜ.

ಮುಂಬೈ ಮೂಲದ ‘ರೆಂಟ್ ಎ ಬಾಯ್ ಫ್ರೆಂಡ್’ (RABF) ಎಂಬ ಆಪ್ ವೊಂದು ಬಾಡಿಗೆಗೆ ಬಾಯ್ ಫ್ರೆಂಡ್ಸ್ ಗಳನ್ನು ನೀಡುವ ಸೇವೆ ಆರಂಭಿಸಿದೆ. ಇನ್ನು ಒಂದು ಪ್ರಮುಖ ವಿಷಯ ಏನೆಂದರೆ ಖಿನ್ನತೆಯನ್ನು ದೂರ ಮಾಡುವ ಉದ್ದೇಶದೊಂದಿಗೆ ಈ ಆಪ್ ಆರಂಭವಾಗಿದೆ. ಬಾಯ್ ಫ್ರೆಂಡ್ ಗಳಿಂದ ಖಿನ್ನತೆ ದೂರವಾಗುತ್ತಾ? ಇವೆರಡಕ್ಕೂ ಸಂಬಂಧ ಇದೆಯಾ? ಬಾಡಿಗೆಗೆ ಬಾಯ್ ಫ್ರೆಂಡ್ ಪರಿಕಲ್ಪನೆ ಭಾರತದಲ್ಲಿ ಸಾಧ್ಯವೇ? ಈ ಆಪ್ ಹೇಗೆ ನಡೆಯುತ್ತದೆ? ಎಂಬ ನಿಮ್ಮ ಎಲ್ಲಾ ಪ್ರಶ್ನೆಗಳಿಗೆ ಉತ್ತರ ಇಲ್ಲಿದೆ…

ಆಗಸ್ಟ್ 15ರಂದು ಭಾರತದಲ್ಲಿ ಈ ಆಪ್ ಆರಂಭವಾಗಿದ್ದು, ಬಾಯ್ ಫ್ರೆಂಡ್ ನನ್ನು ಬಾಡಿಗೆಗೆ ನೀಡುತ್ತಿದೆ. 29 ವರ್ಷದ ಕೌಶಲ್ ಪ್ರಕಾಶ್ ಈ ಆಪ್ ಸೇವೆ ಆರಂಭಿಸಿದ್ದು, ಈತ ಹೇಳುವ ಪ್ರಕಾರ, ಈತ ಸುಮಾರು 3 ವರ್ಷಗಳ ಕಾಲ ಖಿನ್ನತೆಗೆ ಒಳಗಾಗಿದ್ದನಂತೆ. ಅಪ್ ನ ಸಾಮಾಜಿಕ ಜಾಲತಾಣಗಳಲ್ಲಿ ಈ ಆಪ್ ಬಗ್ಗೆ ಈತ ಹೇಳಿಕೊಂಡಿರುವುದಿಷ್ಟು…
‘ಆರ್ ಎಬಿಎಫ್ ಸೇವೆ ಹುಡುಗ ಹಾಗೂ ಹುಡುಗಿಯರಿಬ್ಬರಿಗೂ ಸಿಗಲಿದ್ದು, ಒಪ್ಪಂದದ ಮೇರೆಗೆ ಪುಣೆ ಹಾಗೂ ಮುಂಬೈ ನಗರದಲ್ಲಿ ಸೇವೆ ದೊರೆಯಲಿದೆ. ದೇಶದಲ್ಲಿ ಖಿನ್ನತೆ ಸಮಸ್ಯೆಯನ್ನು ಬಗೆಹರಿಸಲು ಹಾಗೂ ಪುರುಷರಿಗೆ ಉದ್ಯೋಗ ಕಲ್ಪಿಸಲು ಈ ಆಪ್ ವೇದಿಕೆಯಾಗಲಿದೆ. ಇದರ ಮೂಲಕ ಪ್ರತಿಯೊಬ್ಬರೂ ತಮ್ಮ ಜೀವನವನ್ನು ಮತ್ತಷ್ಟು ಆತ್ಮ ವಿಶ್ವಾಸದಿಂದ ಎದುರಿಸಬಹುದು.’

ಒಂಟಿತನ ಹಾಗೂ ಖಿನ್ನತೆಗೆ ಒಳಗಾಗಿರುವವರು ಬಾಡಿಗೆಗೆ ಬಾಯ್ ಫ್ರೆಂಡ್ ಗಳನ್ನು ಪಡೆದು ಅವರೊಂದಿಗೆ ಸುತ್ತಾಟ, ಫನ್ ಆಕ್ಟಿವಿಟಿ, ಊಟ, ಕಾಫಿಯನ್ನು ಸೇವಿಸಿ ತಮ್ಮ ಚಿಂತೆಯನ್ನು ಮರೆಯಬಹುದು ಎನ್ನುತ್ತಾರೆ ಈ ಆಪ್ ತಂಡದ ಸದಸ್ಯರು.

ಸದ್ಯ ಈ ಆಪ್ ತಂಡದಲ್ಲಿ 22 ವರ್ಷದಿಂದ 25 ವರ್ಷದೊಳಗಿನ ಆರು ಹುಡುಗರಿದ್ದು, ಇವರು ಬಾಡಿಗೆ ಬಾಯ್ ಫ್ರೆಂಡ್ ಆಗಲಿದ್ದಾರೆ. ಸದ್ಯಕ್ಕೆ ಪುಣೆ ಮತ್ತು ಮುಂಬೈನಲ್ಲಿ ಮಾತ್ರ ಈ ಬಾಡಿಗೆ ಬಾಯ್ ಫ್ರೆಂಡ್ ಸೇವೆ ದೊರೆಯಲಿದ್ದು, ಈ ಆಪ್ ನಲ್ಲಿ ಮೂರು ವಿಭಾಗದ ಆಯ್ಕೆಗಳಿವೆಯಂತೆ.

  • ಮೊದಲನೆಯದು ಎ ವಿಭಾಗ. ಇಲ್ಲಿ ಪ್ರತಿ ಗಂಟೆಗೆ ₹3000ಕ್ಕೆ ಸೆಲೆಬ್ರಿಟಿಗಳು ಬಾಡಿಗೆ ಬಾಯ್ ಫ್ರೆಂಡ್ ಆಗುತ್ತಾರೆ.
  • ಎರಡನೆಯದು ಬಿ ವಿಭಾಗ. ಇಲ್ಲಿ ಪ್ರತಿಗಂಟೆಗೆ ₹ 2000ಕ್ಕೆ ಪುರುಷ ರೂಪದರ್ಶಿಗಳು ಬಾಡಿಗೆ ಬಾಯ್ ಫ್ರೆಂಡ್ ಆಗಿ ಸಿಗುತ್ತಾರೆ.
  • ಮೂರನೆಯ ವಿಭಾಗದಲ್ಲಿ ಸಾಮಾನ್ಯ ಯುವಕರು ಪ್ರತಿ ಗಂಟೆಗೆ ₹ 300- 400ಕ್ಕೆ ಬಾಡಿಗೆ ಬಾಯ್ ಫ್ರೆಂಡ್ ಆಗುತ್ತಾರೆ.

ಈ ಆಪ್ ಟಾಲ್ ಫ್ರೀ ದೂರವಾಣಿ ಸಂಖ್ಯೆ ಹೊಂದಿದ್ದು, ಇಲ್ಲಿಗೆ ಕರೆ ಮಾಡಿದರೆ ಮನೋತಜ್ಞರು ಮಾರ್ಗದರ್ಶನ ನೀಡುತ್ತಾರಂತೆ. ಇದಕ್ಕಾಗಿ ಪ್ರತಿ ಗಂಟೆಗೆ ₹500 ಶುಲ್ಕ ವಿಧಿಸುತ್ತಾರೆ.

Leave a Reply