ಬಿಜೆಪಿಗೆ ಕೌಂಟರ್ ಕೊಟ್ಟೇ ಬಿಡ್ತಾ ಮೈತ್ರಿ..!?

ಡಿಜಿಟಲ್ ಕನ್ನಡ ಟೀಮ್:

ರಾಜ್ಯ ಸರ್ಕಾರವನ್ನು ಕೆಡವಲು ಬಿಜೆಪಿ ನಾಯಕರು ಇನ್ನಿಲ್ಲದ ಕಸರತ್ತು ಮಾಡ್ತಿದ್ದಾರೆ. ಇದೇ ಕಾರಣಕ್ಕಾಗಿ ಕಾಂಗ್ರೆಸ್​ ನಾಯಕರಾದ ರಮೇಶ್​ ಜಾರಕಿಹೊಳಿ ಹಾಗೂ ಮಹೇಶ್​ ಕುಮಟಳ್ಳಿ, ಉಮೇಶ್​ ಜಾಧವ್​ ಹಾಗೂ ನಾಗೇಂದ್ರ ಅವರನ್ನು ಮುಂಬೈನ ಹೋಟೆಲ್​ನಲ್ಲಿ ಇಟ್ಟುಕೊಂಡಿದ್ದಾರೆ. ಅವರನ್ನು ನೋಡಿಕೊಳ್ಳಲು ಮಲ್ಲೇಶ್ವರಂ ಬಿಜೆಪಿ ಶಾಸಕ ಡಾ ಆಶ್ವಥ್​ ನಾರಾಯಾಣ್​ ಹಾಗೂ ಅರಭಾವಿ ಶಾಸಕ ಬಾಲಚಂದ್ರ ಜಾರಕಿಹೊಳಿ ಅತೃಪ್ತರ ಜೊತೆಯಲ್ಲೇ ಠಿಕಾಣಿ ಹೂಡಿದ್ದಾರೆ. ಇದೇ ಕಾರಣಕ್ಕೆ ಇಂದಿನ ಬಜೆಟ್​ ಅಧಿವೇಶನದಿಂದಲೂ ದೂರ ಉಳಿದಿದ್ದಾರೆ. ಕಾಂಗ್ರೆಸ್​ನ ನಾಲ್ವರು ಅತೃಪ್ತ ಶಾಸಕರು ಮುಂಬೈನಲ್ಲಿ ವಾಸ್ತವ್ಯ ಹೂಡಿದ್ರೆ ಇನ್ನೂ ಐವರು ಬಜೆಟ್​ ಅಧಿವೇಶನಕ್ಕೆ ಬಂದಿಲ್ಲ. ಇವರೆಲ್ಲಾ ಬಿಜೆಪಿ ಸಂಪರ್ಕದಲ್ಲಿ ಇದ್ದಾರಾ ಅನ್ನೋ ಅನುಮಾನ ಕಾಂಗ್ರೆಸ್​ ನಾಯಕರನ್ನು ಕಾಡುತ್ತಿದೆ.

ಈ ನಡುವೆ ಮೈತ್ರಿ ಸರ್ಕಾರವೇನು ಕೈಕಟ್ಟಿ ಕುಳಿತಿಲ್ಲ. ಒಂದು ವೇಳೆ ಕಾಂಗ್ರೆಸ್​ನ ಅತೃಪ್ತ ಶಾಸಕರನ್ನು ಬಿಜೆಪಿ ನಾಯಕರು ರಾಜೀನಾಮೆ ಕೊಡಿಸಲು ಮುಂದಾದ್ರೆ, ಮೈತ್ರಿ ಸರ್ಕಾರ ಕೂಡ ಬಿಜೆಪಿ ಶಾಸಕರನ್ನು ರಾಜೀನಾಮೆ ಕೊಡಿಸಲು ಯೋಜನೆ ರೂಪಿಸಿದೆ. ಬಿಜೆಪಿಯ ಒಟ್ಟು 6 ಮಂದಿ ಶಾಸಕರು ಗೈರು ಹಾಜರಾಗಿದ್ದು, ಅದರಲ್ಲಿ ಇಬ್ಬರು ಮುಂಬೈನಲ್ಲಿ ಶಾಸಕರ ಉಸ್ತುವಾರಿ ನೋಡಿಕೊಳ್ತಿದ್ರೆ, ಇನ್ನೂ ನಾಲ್ವರು ಶಾಸಕರು ಬಿಜೆಪಿಗೆ ತಲೆನೋವು ತರಿಸಿದ್ದಾರೆ. ಒಂದು ವೇಳೆ ಕಾಂಗ್ರೆಸ್​ ಶಾಸಕರನ್ನು ರಾಜೀನಾಮೆ ಕೊಡಿಸಿದ್ರೆ ಸರ್ಕಾರ ಕೂಡ ನಾಲ್ವರು ಶಾಸಕರನ್ನು ಸೆಳೆದುಬಿಡುತ್ತಾ ಅನ್ನೋ ಆತಂಕ ಕಮಲ ಪಾಳಯವನ್ನೂ ಕಾಡುವಂತೆ ಮಾಡಿದೆ.

ಈ ನಡುವೆ ಅಧಿವೇಶನದ ಎರಡನೇ ದಿನವೇ ಕಾಂಗ್ರೆಸ್​ ಶಾಸಕರನ್ನು ಕರೆತಂದು ರಾಜೀನಾಮೆ ನೀಡಿಸಲು ಬಿಜೆಪಿ ಪಾಳಯ ಚಿಂತನೆ ನಡೆಸಿದ್ರೆ, ಅಷ್ಟರೊಳಗಾಗಿ ಇಬ್ಬರು ಅತೃಪ್ತರನ್ನು ಅನರ್ಹ ಮಾಡಲು ಸ್ಪೀಕರ್​ಗೆ ಶಿಫಾರಸು ಮಾಡಲು ಕಾಂಗ್ರೆಸ್​ ಕೂಡ ಸಂಚು ಮಾಡಿಕೊಂಡಿದೆ. ಕಾಂಗ್ರೆಸ್​ ಶಾಸಕರಿಗೆ ಬರೋಬ್ಬರಿ 30 ಕೋಟಿ ರೂಪಾಯಿ ಆಫರ್​ ಕೊಟ್ಟಿದ್ದಾರೆ ಎಂದು ಆರೋಪಿಸಿದ್ದಾರೆ. ಇನ್ನೂ ಮಾಜಿ ಪ್ರಧಾನಿ ದೇವೇಗೌಡರೂ ಕೂಡ ದೆಹಲಿಯಲ್ಲಿ ಬಿಜೆಪಿ ಆಪರೇಷನ್​ ಬಗ್ಗೆ ಮಾತನಾಡಿದ್ದು, ತಾಕತ್ತಿದ್ರೆ ಬಿಜೆಪಿ ಅವಿಶ್ವಾಸ ಮಂಡನೆ ಮಾಡಲಿ, ಮೈತ್ರಿ ಸರ್ಕಾರ ಕೂಡ ಸದನದಲ್ಲೇ ತನ್ನ ವಿಶ್ವಾಸ ಮತ ಯಾಚಿಸಿ ಗೆಲ್ಲಲಿದೆ ಅಂತಾ ವಿಶ್ವಾಸ ವ್ಯಕ್ತಪಡಿಸುವ ಮೂಲಕ ಮೈತ್ರಿ ಸರ್ಕಾರವನ್ನು ಬಿಜೆಪಿ ಉರುಳಿಸಲು ಸಾಧ್ಯವಿಲ್ಲ ಎಂದಿದ್ದಾರೆ.

Leave a Reply