ಇವತ್ತು ಏನೆಲ್ಲಾ ಆಗಬಹುದು ಗೊತ್ತಾ..?

ಡಿಜಿಟಲ್ ಕನ್ನಡ ಟೀಮ್:

ಬಿಜೆಪಿ ನಾಯಕರು ಕಳೆದ ಎರಡು ದಿನಗಳಿಂದ ಬಜೆಟ್​ ಅಧಿವೇಶನ ನಡೆಯುವುದಕ್ಕೆ ಅವಕಾಶ ಕೊಟ್ಟಿಲ್ಲ. ಇವತ್ತು ಸಿಎಂ ಕುಮಾರಸ್ವಾಮಿ ಬಜೆಟ್​ ಮಂಡನೆಗೆ ಅವಕಾಶ ನೀಡಬಾರದು ಅನ್ನೋ ಲೆಕ್ಕಾಚಾರದಲ್ಲೂ ಇದ್ದಾರೆ. ಯಾವುದೇ ಕಾರಣಕ್ಕೂ ಸಿಎಂ ಬಜೆಟ್​ ಮಂಡನೆಗೆ ಅವಕಾಶ ಕೊಡಬಾರದು. ಒಂದು ವೇಳೆ ಸಿಎಂ ಕುಮಾರಸ್ವಾಮಿ ಬಜೆಟ್​ ಮಂಡನೆ ಮಾಡಿದ್ರೆ ಅಂಗೀಕಾರ ಆಗದಂತೆ ಏನು ಮಾಡಬೇಕೋ ಅದನ್ನು ಮಾಡಿಯೇ ತೀರಬೇಕು ಅನ್ನೋ ಲೆಕ್ಕಾಚಾರ ಕಮಲ ನಾಯಕರದ್ದು. ಈ ಅಧಿವೇಶನದಲ್ಲಿ ಬಜೆಟ್​ ಅಂಗೀಕಾರಗೊಂಡು ಸದನದ ಒಪ್ಪಿಗೆ ದೊರೆಯದಿದ್ದರೆ, ಸರ್ಕಾರ ಹಣ ಖರ್ಚು ಮಾಡಲು ಸಾಧ್ಯವಾಗದೆ ಸಾಂವಿಧಾನಿಕ ಬಿಕ್ಕಟ್ಟು ಎದುರಾಗಲಿದೆ. ಒಂದು ವೇಳೆ ಬಜೆಟ್​ಗೆ ಸದನದಲ್ಲಿ ಸೋಲಾದರೆ ಸರ್ಕಾರಕ್ಕೆ ಸೋಲು ಆದಂತೆ ಎನ್ನುವುದು ಬಿಜೆಪಿ ನಾಯಕರ ಯೋಜನೆ.

ಸರ್ಕಾರ ಕೂಡ ಬಿಜೆಪಿ ನಾಯಕರ ಯೋಜನೆ ತಲೆ ಕೆಳಗೆ ಮಾಡಲು ಪ್ರತಿತಂತ್ರ ರೂಪಿಸಿದ್ದು, ಬಜೆಟ್​ ಮಂಡಿಸಿಯೇ ಸಿದ್ಧ ಎಂದು ಪಣ ತೊಟ್ಟಿರುವ ಸಿಎಂ, ಬಿಜೆಪಿ ನಾಯಕರ ಯೋಜನೆಗಳನ್ನು ತಲೆ ಕೆಳಗಾಗುವಂತೆ ಮಾಡಲು ಸರ್ಕಾರ ಕೂಡ ಯೋಜನೆ ರೂಪಿಸಿದ್ದು, ಬಜೆಟ್​ ಪ್ರತಿ ಹರಿಯುವುದನ್ನು ತಡೆಯಲು ಬಜೆಟ್​ ಪ್ರತಿಯನ್ನು ಭಾಷಣ ಮುಗಿಯುವ ತನಕ ಕೊಡದೇ ಇರಲು ನಿರ್ಧಾರ ಮಾಡಲಾಗಿದೆ. ಒಂದು ವೇಳೆ ಬಿಜೆಪಿ ನಾಯಕರು ಬಾವಿಗಿಳಿದು ಪ್ರತಿಭಟನೆ ಮಾಡಿದ್ರೆ ಬಿಜೆಪಿ ಸದಸ್ಯರನ್ನು ಅಮಾನತು ಮಾಡಿ ಸದನದಿಂದ ಹೊರಗೆ ಇಡುವ ನಿರ್ಧಾರ ಪ್ರಕಟವಾಗುವ ಸಾಧ್ಯತೆಯಿದೆ. ಒಂದು ವೇಳೆ ಅಮಾನತುಗೊಂಡರೆ ಬಜೆಟ್​ ಮಂಡನೆ ಹಾಗೂ ಅಂಗೀಕಾರ ಸರಳವಾಗಲಿದೆ.

ಇನ್ನು ಅತೃಪ್ತರು ರಾಜೀನಾಮೆ ನೀಡಲು ಮುಂದಾದರೆ ಕಾಂಗ್ರೆಸ್​ ಪಕ್ಷದಿಂದ ಅಮಾನತು ಹಾಗೂ ಶಾಸಕ ಸ್ಥಾನದಿಂದ ಅನರ್ಹ ಮಾಡಲು ಮೈತ್ರಿ ಪಕ್ಷಗಳು ಮಾನಸಿಕವಾಗಿ ಸಿದ್ದವಾಗಿದ್ದು, ಅಧಿವೇಶನವನ್ನು ಯಶಸ್ವಿಯಾಗಿ ಮುಕ್ತಾಯಗೊಳಿಸಬೇಕು ಅನ್ನೋ ಚಿಂತನೆಯಲ್ಲಿದ್ದಾರೆ. ಒಂದು ವೇಳೆ ಅತೃಪ್ತರು ರಾಜೀನಾಮೆ ಕೊಡಲು ಮುಂದಾಗ್ತಿದ್ದ ಹಾಗೆ ಅನರ್ಹ ಮಾಡಿ ಸ್ಪೀಕರ್​ ಆದೇಶ ಮಾಡಿದರೆ, ಅವರು ಕೋರ್ಟ್​ ಮೊರೆ ಹೋಗಲಿದ್ದಾರೆ. ಹೈಕೋರ್ಟ್​ನಲ್ಲಿ ಕೆಲವು ತಿಂಗಳು ಕಾಲ ಎಳೆದಾಡಬಹುದು. ಒಂದು ವೇಳೆ ಸರ್ಕಾರದ ವಿರುದ್ಧವಾಗಿ ತೀರ್ಪು ಬಂದರೆ, ಮತ್ತೆ ಸುಪ್ರೀಂಕೋರ್ಟ್​ನಲ್ಲಿ ಸರ್ಕಾರ ಮೇಲ್ಮನವಿ ಸಲ್ಲಿಸುವ ಮೂಲಕ ಮತ್ತೆ ಕಾನೂನು ಬಲೆಯೊಳಗೆ ಸಿಲುಕಿಸಿಕೊಳ್ಳಬಹುದು. ಅಷ್ಟರೊಳಗೆ ಸುಭದ್ರ ಸರ್ಕಾರಕ್ಕೆ ಏನು ಬೇಕು ಅದನ್ನು ನೆಮ್ಮದಿಯಾಗಿ ಮಾಡಬಹುದು ಅನ್ನೋದು ಮೈತ್ರಿ ಸರ್ಕಾರದ ಲೆಕ್ಕಾಚಾರ. ಒಟ್ಟಾರೆ ಇವತ್ತು ಸಾಕಷ್ಟು ಬೆಳವಣಿಗೆ ನಡೆಯೋ ಎಲ್ಲಾ ಸಾಧ್ಯತೆಗಳೂ ಇವೆ.

Leave a Reply